ధోనీ క్యారెక్టర్ పై అనుమానాలు

రాంచీ: ప్రపంచ క్రికెట్ అభిమానుల దృష్టిలో ప్రముఖ క్రికెటర్ మహేంద్ర సింగ్ ధోనీ తారనే కావచ్చు, కానీ సొంత రాష్ట్రంలో ప్రభుత్వానికి మాత్రం ఆయన క్యారెక్టర్ పై అనుమానాలున్నాయి. ధోనీ 9 ఎంఎం పిస్టల్ ను కొనుక్కోవాలనుకున్నాడు. అందుకు ఆయన లైసెన్స్ కోసం దరఖాస్తు చేసుకున్నాడు. దీనికి లైసెన్స్ ను కేంద్ర హోంమంత్రి మంత్రిత్వ శాఖ జారీ చేయాల్సి ఉంటుంది. అయితే జార్ఖండ్ ప్రభుత్వం ధోనీ లైసెన్స్ కోసం కేంద్ర ప్రభుత్వానికి సిఫార్సు చేయకపోగా ధోనీ క్యారెక్టర్ ను అనుమానిస్తోంది.

రాష్ట్రంలో తీవ్రవాదం, ఉగ్రవాదం, నేర కార్యకలాపాలు పెరుగుతున్నందున ధోనీ స్వచ్ఛతా ప్రమాణ పత్రం సమర్పించాల్సి ఉంటుందని లేదా ఎస్పీ (స్పెషల్ బ్రాంచ్), ఎస్పీ (విజిలెన్స్), ఎస్పీ (సిఐడి)ల నుంచి క్యారెక్టర్ సర్టిఫికెట్ కావాలని రాంచీ జిల్లా మెజిస్ట్రేట్ ధోనీకి లేఖ రాశారు. పోలీసు అధికారులు కూడా అదే పద్ధతిలో వ్యవహరిస్తూ వస్తున్నారు. అధికారిక నియమాల ప్రకారమే తాము ధోనీకి అటువంటి లేఖ పంపామని డిప్యూటీ కమీషనర్ రాజీవ్ అరుణ్ ఎక్కా చెబుతున్నారు. మూడు నెలలుగా అధికారులు ఈ విషయంలో జాప్యం చేస్తూ వస్తున్నారు. ఆగస్టులో ధోనీ దరఖాస్తు చేసుకుంటే ఇప్పటి వరకు తేల్చలేకపోయారు.