రిటైర్డ్ జడ్జి విచారణకు రెడీ: జానా

హైదరాబాద్: పరిటాల రవి హత్య కేసులో నిందితుడు మొద్దు శీను హత్యపై రిటైర్డ్ జడ్జితో విచారణ చేయించడానికి ప్రభుత్వం సిద్ధంగా ఉందని రాష్ట్ర హోం మంత్రి కె. జానారెడ్డి చెప్పారు. సిట్టింగ్ జడ్జితో విచారణ జరిపించలేమని ఆయన బుధవారం మీడియా ప్రతినిధుల సమావేశంలో అన్నారు. సిట్టింగ్ జడ్జితో విచారణ జరిపించాలని అడిగే నైతిక హక్కు తెలుగుదేశం పార్టీకి లేదని ఆయన అన్నారు. మొద్దు శీను హత్యను ప్రతిపక్షాలు రాజకీయం చేస్తున్నాయని ఆయన విమర్శించారు.

తాము అన్ని సందర్భాల్లోనూ పారదర్శకంగా ఉండడానికి ప్రయత్నించామని, నాలుగున్నరేళ్ల తమ పాలనలో 10 సంఘటనల్లో రిటైర్డ్ జడ్జి విచారణకు పూనుకున్నామని, 21 సంఘటనల్లో సిబిఐ చేత విచారణ జరిపించామని ఆయన అన్నారు. పారదర్శకతను, నిజాయితీని నిరూపించుకోవడానికి తాము ఏ రోజు కూడా వెనకాడలేదని ఆయన అన్నారు. ప్రభుత్వంపై ప్రజల వ్యతిరేత లేకపోవడంతో ప్రతిపక్షాలు అసత్య ఆరోపణలు చేస్తున్నాయని, తద్వారా ప్రజల దృష్టిని మళ్లించడానికి ప్రయత్నిస్తున్నాయని ఆయన విమర్శించారు.