విలాసరావుకు వర్మ చిక్కులు

ముంబయి: ముంబయి ఉగ్రవాద దాడులకు గురైన తాజ్, ట్రెడెంట్ హోటళ్లను మహారాష్ట్ర ముఖ్యమంత్రి విలాసరావు దేశ్ ముఖ్ బాలీవుడ్ దర్శక నిర్మాత రాంగోపాల్ వర్మ వెంట పెట్టుకుని సందర్శించడానికి వివాదానికి కారణమైంది. విలాస్ రావు దేశ్ ముఖ్ ఆదివారంనాడు ఆ రెండు హోటళ్లను సందర్శించారు. ఆయన వెంట వర్మతో పాటు ఆయన కుమారుడు, నటుడు రితేష్ ఉండడంతో పలువురు ముక్కున వేలేసుకున్నారు. దీంతో విలాస్ రావు దేశ్ ముఖ్ పై విమర్శలు వెల్లువెత్తాయి.

అయితే, తాను రితేష్ వెంట వెళ్లానని, ముఖ్యమంత్రి దేశ్ ముఖ్ తో తనకు పరిచయం లేదని రామ్ గోపాల్ వర్మ చెప్పారు. రితేష్ వెంట వెళ్లడంలో తప్పేమిటని ఆయన అడిగారు. విలాసరావు తనను గుర్తు పడతారో లేదో కూడా తనకు తెలియదని ఆయన అన్నారు. ముంబయి ఉగ్రవాద దాడులపై సినిమా తీసే ఉద్దేశం తనకు లేదని వర్మ చెప్పారు. విలాసరావు వెంట తాను వెళ్లడం కేవలం యాదృచ్ఛికమేనని ఆయన అన్నారు.