చిరు నినాదంతో బాలయ్య?

చిరంజీవిని ఎదుర్కొనేందుకు ఆయన నినాదం సామాజిక న్యాయం అనే దాన్నే బాలకృష్ణ చేపట్టనున్నట్లు తెలుస్తోంది.తెలుగుదేశం పార్టీ తరుపున హిందూపురం నుంచి బాలయ్య ఈ నెల 29నుంచి ప్రచారం ప్రారంభించనున్న సంగతి తెలిసిందే. అందులో ఆయన ముఖ్యంగా ప్రజారాజ్యం పార్టీ హవాను ఎదుర్కొనేందుకు నిర్ణయంచుకున్నారు.అందుకే చిరంజీవి చెబుతున్న సామాజిక న్యాయాన్ని తెదేపా ఇప్పటికే చేసి చూపించిందని సవివరంగా చెప్పాలన్న వ్యూహంతో బాలయ్య ఉన్నట్లు పార్టీ వర్గాలు చెబుతున్నాయి.

అసలు తెలుగుదేశం హయాంలోనే రాష్ట్రంలో సామాజిక న్యాయం అనే ఆలోచన పుట్టిందని ఆయన ప్రజలకు మరీ మరీ చెప్పనున్నారు. అందుకు నిదర్శనంగా బీసీ నాయకులు రాజకీయంగా కీలక స్థానాలకు ఎదగడానికి.. మండల స్థాయిలో ఆ వర్గాలకు తెదేపా కల్పించిన రిజర్వేషన్లు, పార్టీ వారికిచ్చిన ఆదరణే కారణమని సోదాహరణంగా ప్రజలకు వివరించనున్నారు. అందుకు తగినట్లే బాలయ్య ప్రసంగ పాఠాలు రెడీ చేసుకుంటున్నారు. ఇక అదే సమయంలో కాంగ్రెస్‌ పార్టీ అవినీతిమయం అంటూ పూర్తి స్దాయి విమర్శలకు దిగాలన్న ఉద్దేశంతో కూడా ఆయన ఉన్నట్లు సమాచారం.