వైయస్ వి చిచ్చు వ్యాఖ్యలు: బాబు

హైదరాబాద్: ముఖ్యమంత్రి వైయస్ రాజశేఖర రెడ్డి రెచ్చగొట్టే ప్రసంగం చేశారని తెలుగుదేశం అధినేత నారా చంద్రబాబు నాయుడు తప్పుబట్టారు. ముఖ్యమంత్రి స్థాయిలోని వ్యక్తికి ఎక్కువ భావోద్వేగం మంచిది కాదని ఆయన అన్నారు. బాధ్యత గల వ్యక్తిగా సంయమనం పాటించాలని ఆయన వైఎస్‌కు సూచించారు. బుధవారం అసెంబ్లీలో ముఖ్యమంత్రి ప్రసంగం అనంతరం ప్రతిపక్ష నేత చంద్రబాబు ఆయన వ్యాఖ్యల్ని తిప్పికొట్టే ప్రయత్నం చేశారు. ముఖ్యమంత్రి బాధల్లో ఉన్నట్లు ఆయన తీరు తెలియజేస్తోందని వ్యాఖ్యానించారు. రాబోయే ఐదేళ్లూ ఆ బాధలు తప్పవని పేర్కొన్నారు. వైఎస్‌ కుటుంబం కర్నాటకలోని బెంగుళూరులో వ్యాపారాలు, కళాశాలలు పెట్టలేదా అని ప్రశ్నించారు. 2004లో తెరాసతో పొత్తుపెట్టుకుని ప్రణబ్‌ కమిటీకి కాంగ్రెస్‌ అభిప్రాయం ఎందుకు తెలపలేదని నిలదీశారు. తెరాసకు కేంద్రంలో, రాష్ట్రంలో మంత్రి పదవులిచ్చి పక్కన ఆనందంగా కూర్చోబెట్టుకున్నప్పుడు ఇవన్నీ గుర్తుకు రాలేదా అని విమర్శించారు.

"మొదటి విడత ఎన్నికలు ముగియగానే నంద్యాలలో మాట్లాడుతూ హైదరాబాద్‌లో కోస్తా, రాయలసీమ వాసులు విదేశీయులవుతారని ఎందుకు చెప్పారు. పులిచింతలకు శంకుస్థాపన చేస్తే అక్కడ గుడిసెల్ని తగలబెట్టిన వ్యక్తి ఈ రోజు మీ మంత్రివర్గంలో ఉన్నారు. జిల్లా, జిల్లాకు, ప్రాంతాల మధ్య విభేదాలు సృష్టించే ప్రయత్నం చేస్తున్నారు. హైదరాబాద్‌లో ఎన్నికలు ఉన్నాయని రెచ్చగొడుతున్నారు. బాధ్యతగల ముఖ్యమంత్రిగా ఉండి ఎన్నికల కోసం ప్రజల మధ్య చిచ్చుపెట్టే పద్ధతి మంచిదికాదు. తెలంగాణను అడ్డం పెట్టుకుని చిచ్చుపెట్టే ప్రయత్నం మీరు చేస్తున్నారు. పోతిరెడ్డిపాడు ప్రారంభించిందే తెదేపా ప్రభుత్వం. ముఖ్యమంత్రిలో స్వార్థ్యం పెరిగిపోయింది. రాష్ట్ర ప్రజల్లో అభద్రతా భావం కలిగించొద్దు. తెలంగాణలో ఎత్తిపోతల పథకాలు పెట్టి, కోస్తాంధ్రలో అదనపు నీళ్లిస్తామంటున్నారు. విభేదాలు కాకుండా అభివృద్ధి ఫలితాలు అందేలా చూడండి. తీరు మార్చుకోండి. తెలంగాణ విషయంలో మోసం చేయడం సరికాదు" అని చంద్రబాబు అన్నారు.