తెలుగుదేశం కూరగాయల దుకాణం

హైదరాబాద్: ధరల పెరుగుదలకు నిరసనగా తెలుగుదేశం శాసనసభ్యులు శుక్రవారం ఉదయం శాసనసభ ఎదురుగా ఉన్న గన్ పార్కు వద్ద నమూనా కిరాణాషాపును, కూరగాయల దుకాణాన్ని నడిపింది. నిత్యావసర సరుకులు, కూరగాయల ధరలు సామాన్య, పేద ప్రజలకు అందుబాటులో లేవని చూపించడానికి వారు క్రయవిక్రయాలు నడిపారు. కొందరు శాసనసభ్యులు సరుకులను అమ్మేవారిగానూ మరికొంత మంది కొనేవారిగానూ నటించారు. ధరలు ఎలా పెరుగుతున్నాయో వారు నటించి చూపించారు. కేంద్ర, రాష్ట్ర ప్రభుత్వాలపై వారు వ్యంగ్య వ్యాఖ్యలు చేశారు. కాంగ్రెసు అధ్యక్షురాలు సోనియా గాంధీ సబ్సిడీ పథకం కింద కూరగాయలు కిలో నూరు రూపాయలకే ఇస్తున్నామని, ఆలసిస్తే వాటి ధర రెండింతలవుతుందని కేకలు వేశారు.

నిత్యావసర సరుకుల ధరలు పెరగడానికి కేంద్ర, రాష్ట్ర ప్రభుత్వాలే బాధ్యత వహించాలని వారు విమర్శించారు. ఎన్నికల హామీలను ముఖ్యమంత్రి డాక్టర్ వైయస్ రాజశేఖర రెడ్డి విస్మరించారని వారు మీడియా ప్రతినిధులతో అన్నారు. పేదల బతుకులను గమనించే స్థితిలో ప్రభుత్వం లేదని వారన్నారు. ఏం కొనేట్లు లేదు, ఏం తినేట్లు లేదని వారన్నారు. అనంతరం కూరగాయల దండలను మెడలో వేసుకుని శాసనసభ సమావేశానికి హాజరయ్యారు. శాసనసభలో నిత్యావసర ధరల పెరుగుదలపై జరిగిన చర్చలో పాల్గొన్నారు.