స్వైన్ ఫ్లూ మృతి: మరో విషాదం

హైదరాబాద్: ఆంధ్రప్రదేశ్ రాజధాని హైదరాబాదులో రెండో స్వైన్ ఫ్లూ మరణం సంభవించింది. హైదరాబాదులోని అపోలో అస్పత్రిలో మాలాద్రి అనే వ్యక్తి స్వైన్ ఫ్లూతో మంగళవారం మరణించాడు. ఒకే రోజు హైదరాబాద్ లో రెండు స్వైన్ ఫ్లూ మరణం సంభవించడంతో నగరవాసులు తీవ్ర ఆందోళనకు గురవుతున్నారు. హైదరాబాదులోని చెస్ట్ ఆస్పత్రిలో ప్రసాద్ అనే వ్యక్తి మరణించిన విషయం తెలిసిందే. భర్త మాలాద్రి మరణ వార్తను తట్టుకోలేక ఆయన భార్య శోభ ఆకస్మికంగా మరణించింది. దీంతో వారి కుటుంబ సభ్యులు తీవ్ర విషాదంలో మునిగిపోయారు.

ఇదిలా ఉంటే, స్వైన్ ఫ్లూ వ్యాధిపై ప్రభుత్వం అప్రమత్తంగా ఉందని రాష్ట్ర ఆరోగ్య శాఖ మంత్రి దానం నాగేందర్ చెప్పారు. ప్రసాద్ స్వైన్ ప్లూతో మరణించినట్లు నిర్ధారణ కాలేదని ఆయన బుధవారం మీడియా ప్రతినిధులతో అన్నారు. స్వైన్ ఫ్లూపై ప్రజలు భయపడాల్సిన అవసరం లేదని, అన్ని రకాల చర్యలు తీసుకుంటామని ఆయన చెప్పారు. పూణే నుంచి నగరానికి వస్తున్న వారి నుంచి ఇక్కడ స్వైన్ ఫ్లూ వ్యాపిస్తోందని ఆయన అన్నారు.