మంచి నీళ్లు ప్రాణాలు తీశాయి

వరంగల్: ప్రాణాలు నిలపాల్సిన నీళ్లే ప్రాణాలు తీశాయి. విష గుళికలు కలిపిన నీరు సేవించడంతో వరంగల్ జిల్లాకు చెందిన ముగ్గురు కూలీల ప్రాణాలు పోయాయి. వరంగల్ జిల్లా కొడకండ్ల మండలంలోని మైదం చెరువు తండాకు చెందిన ధరావత్ తారమ్మ, నరేష్, సుజాత, లక్ష్మి, సుగుణమ్మ, బుజ్జి, వీరన్న, రుక్కమ్మ, శిరీష, బాలమ్మలు నల్లగొండ జిల్లా తిర్మలగిరిలోని అనంతరెడ్డి పొలంలో వరి పంట కోసేందుకు మంగళవారం కూలీ పనికి వెళ్లారు. దాహం తీర్చుకునేందుకు సమీపంలో ఉన్న కుండలోని నీళ్లు తాగారు. వాటిని తాగి వారు ఆస్వస్థతకు గురయ్యారు.

అంతకు ముందు ఆ కుండలోని నీటిలో విషగుళికలు కలిపి పొలానికి పిచికారి చేశారు. తర్వాత నీటితో కుండను నింపారు. ఇది తెలియక వారు ఆ నీరు తాగారు. వెంటనే అస్వస్థతకు గురయ్యారు. వారిని చికిత్స నిమిత్తం జనగామ ఏరియా ఆస్పత్రికి తరలించారు. పరిస్థితి విషమించడంతో ఎనిమిది మందిని వరంగల్ ఎంజిఎం ఆస్పత్రికి తరలించారు. వీరిలో ముగ్గురు మరణించారు.