వరద సహాయం ఇలాగా?: చిరు కోపం

విశాఖపట్నం: రాష్ట్రంలో వరద సహాయ చర్యలు ఆధునిక పద్ధతిలో లేవని, అందువల్ల బాధితులకు పూర్తి సహాయం అందడం లేదని ప్రజారాజ్యం అధినేత చిరంజీవి వ్యాఖ్యానించారు. వరద బాధితుల కోసం ప్రజల నుంచి విరాళాలు సేకరించేందుకు విశాఖపట్నం వచ్చిన ఆయన తన జోలె యాత్రకు ముందు మీడీయాతో మాట్లాడారు.

విరాళాల సేకరణలో భాగంగా శనివారం ఆయన పార్టీ జిల్లా నేతలతో కలిసి నగరంలోని ప్రధాన వీధుల్లో తిరుగుతూ జోలెయాత్ర ద్వారా ప్రజల నుంచి విరాళాలను సేకరిస్తారు. ఈ పర్యటన సీతంపేట, గురుద్వారా, ఆర్టీసీ కాంప్లెక్స్‌, వన్‌ టౌన్‌ తదితర ప్రాంతాలమీదుగా సాగుతుంది. నిన్న నగరంలోని ఒక హోటల్‌లో దాతలతో ప్రత్యేక విందు కార్యక్రమంలో చిరంజీవి పాల్గొని ప్రసంగించారు. రాజకీయాలకు అతీతంగా ఎంతో నమ్మకంతో దాతలు అందిస్తున్న ప్రతీపైసా వరద బాధితులకు అందేలా మధ్యవర్తిగా ఉంటానని తెలిపారు. మానవత వాదులు వరదబాధితులను ఆదుకునేందుకు ముందుకు రావాలని పిలుపునిచ్చారు.