కెసిఆర్ కు సెంట్రల్ జైల్లో విశ్రాంతి: టిజె వెంకటేష్

హైదరాబాద్: రెచ్చగొట్టే విధానానికి స్వస్తి చెప్పకపోతే తెలంగాణ రాష్ట్ర సమితి (తెరాస) అధ్యక్షుడు కె చంద్రశేఖర రావు కేంద్ర కారాగారంలో విశ్రాంతి తీసుకోవాల్సి వస్తుందని కాంగ్రెసు శాసనసభ్యుడు టిజె వెంకటేష్ వ్యాఖ్యానించారు. బలహీనపడిన తెలంగాణ ఉద్యమాన్ని కొత్త పుంతలు తొక్కించేందుకు కెసిఆర్ మాటల యుద్ధాన్ని ప్రారంభించారని ఆయన సోమవారం మీడియా ప్రతినిధులతో అన్నారు. కెసిఆర్ మత్తులో ఉంటే ఒక రకంగా మత్తులో లేకపోతే మరో రకంగా మాట్లాడుతారని ఆయన వ్యాఖ్యానించారు. కెసిఆర్ మత్తులో ఉంటే రాష్ట్రం సుభిక్షంగా ఉంటుందని ఆయన అన్నారు.

వరద బాధితులను ఆదుకునే ప్రభుత్వ, ప్రైవేట్ సంస్థలు నేరుగా ప్రజలను కలవాలని ఆయన సూచించారు. బాధితుల కోసం వారిచ్చే సహకారం కేంద్ర, రాష్ట్ర ప్రభుత్వాలనకు చేరితే ఆశించినంత ప్రయోజనం చేకూరడం లేదని ఆయన అభిప్రాయపడ్డారు. వరద బాధితులకు దాని వల్ల ఆలస్యంగా సహాయం అందుతోందని ఆయన అన్నారు.