హరీష్ సహా తెరాస నేతల అరెస్టు

హైదరాబాద్: తెలంగాణ భూములను అక్రమంగా వేలం వేస్తున్నారని ఆరోపిస్తూ ధర్నాకు దిగిన తెలంగాణ రాష్ట సమితి (తెరాస) నాయకుడు హరీష్ రావు సహా పలువురు పార్టీ కార్యకర్తలను పోలీసులు అరెస్టు చేశారు. తెలంగాణ భూముల వేలాన్ని వ్యతిరేకిస్తూ తెరాస నేతలు, కార్యకర్తలు సోమవారం హైదరాబాదులోని గృహకల్ప ముందు ధర్నాకు దిగారు. ఒక సమయంలో వారు కార్యాలయం లోనికి చొచ్చుకుపోవడానికి ప్రయత్నించారని, వారిని పోలీసులు అడ్డుకోవడంతో ఉద్రిక్తత నెలకొంది. పోలీసులు ఆందోళనకారులను అరెస్టు చేశారు.

కోర్టు తీర్పునకు వ్యతిరేకంగా హుడా తెలంగాణలోని భూములను వేలానికి పాల్పడుతోందని తెరాస నాయకుడు హరీష్ రావు విమర్శించారు. పేద, మధ్యతరగతి ప్రజలకు ఇళ్లు కట్టించాల్సిన హుడా భూముల వేలానికి దిగడం సరైంది కాదని ఆయన అన్నారు. ఇప్పటి వరకు వేయి కోట్ల రూపాయల విలువ చేసే భూములను వేలం వేసిందని ఆయన విమర్శించారు.