వైయస్ జగన్ జగడంలో కాంగ్రెస్ ఎమ్మెల్యే శ్రీకాంత్ రెడ్డి

కడప: వైయస్ జగన్‌ పై కొందరు చేస్తున్న దుష్ప్రచారం ఆపకుంటే తగిన గుణపాఠం చెబుతామని రాయచోటి ఎమ్మెల్యే గడికోట శ్రీకాంత్‌ రెడ్డి హెచ్చరించారు. రాయచోటిలో ఆయన విలేకరులతో మాట్లాడుతూ, వైయస్ జగన్‌ కాంగ్రెస్‌ పార్టీని వీడతారని, మరో పార్టీ స్థాపించనున్నారంటూ కొందరు పని గట్టుకుని చేస్తున్న దుష్ప్రచారాలను కొట్టిపారేశారు. దివంగత నేత వైయస్ రాజశేఖర రెడ్డి ఆశయ సాధనకు వైయస్ జగన్‌ ఎంతగానో కృషి చేస్తున్నారన్నారు.

రాజీవ్‌, సోనియా గాంధీలకు వైయస్ ఆర్‌ ఎంత విధేయుడుగా ఉన్నారో, ఇప్పుడు వైయస్ జగన్‌ కూడా అదే విధేయతను చూపుతున్నారని చెప్పారు. హైదరాబాద్‌ ఎమ్మెల్యేలలో 80 శాతం మంది కాంగ్రెస్‌ కి చెందిన వారున్నందునే గ్రేటర్‌ ఎన్నికల్లో ప్రజారాజ్యం పార్టీ తో పొత్తుపై విభేదించామన్నారు. పీఆర్పీని కాంగ్రెస్‌ లో విలీనం చేస్తే తమకు అభ్యంతరం లేదన్నారు.