తెరాస పటిష్టతకు కెసిఆర్ దీక్ష: యాష్కీ

నిజామాబాద్: తెలంగాణ రాష్ట్ర సాధన కోసం ఏర్పాటైన తన పార్టీ పటిష్టతకు తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు ఆమరణ దీక్షకు పూనుకుంటున్నారని కాంగ్రెసు నిజామాబాద్ పార్లమెంటు సభ్యుడు మధుయాష్కీ అన్నారు. ఆమరణ దీక్ష గురించి సమాచారం ఇవ్వడానికి ఇటీవల ముఖ్యమంత్రి రోశయ్యను కలిశారని, ఈ సమయంలో తాము తెలంగాణకు సుముఖమేనని రోశయ్య హామీ ఇచ్చారని ఆయన మంగళవారం మీడియా ప్రతినిధులతో చెప్పారు.

తమ పార్టీ అధ్యక్షురాలు సోనియా గాంధీ కరీంనగర్, సికింద్రాబాద్ బహిరంగ సభల్లో తెలంగాణ అంశానికి సానుకూలంగా ప్రతిస్పందించినట్లు ఆయన తెలిపారు. తెలంగాణ రాష్ట్ర ఏర్పాటుకు తెరాస పార్టీ నిబంధనల పరిధిలో పనిచేస్తుంటే తాను పార్టీలకు అతీతంగా పనిచేస్తున్నానని ఆయన చెప్పుకున్నారు.