మంత్రులకు రోశయ్య క్లాస్

హైదరాబాద్: చాలా రోజుల తర్వాత ముఖ్యమంత్రి కె.రోశయ్య తన అధికారాన్ని ప్రదర్శించారు. సోమవారం నాడు మంత్రులకు ఆయన క్లాస్ తీసుకున్నారు. మంత్రుల తీరుపై తీవ్ర ఆగ్రహం వ్యక్తం చేశారు. అంతా కాంగ్రెసు పార్టీ అధిష్టానం చూస్తుందని ఆయన చెప్పారు. ఇంత కాలం పట్టించుకోనట్లుగా వ్యవహరించిన ఆయన ఒక్కసారిగా మంత్రులపై నేరుగా తన అసంతృప్తిని తెలియజేయడం చర్చనీయాంశంగా మారింది. కొంత మంది మంత్రులు సమీక్షా సమావేశాలను, మంత్రి వర్గ సమావేశాలను అషామాషీగా తీసుకుంటున్నారని ఆయన అన్నారు. ఎవరినీ పేరు పెట్టి ప్రస్తావించలేదు. అయితే మంత్రి వర్గ సమావేశాలను, సమీక్షా సమావేశాలను నిర్లక్ష్యం చేసే మంత్రులు తన దృష్టిలోనే కాకుండా పార్టీ అధిష్టానం దృష్టిలోనూ ఉన్నారనే విషయాన్ని వారికి అందించారు.

సోమవారం కొంత మంది మంత్రులు మంత్రివర్గ సమావేశానికి ఆలస్యంగా రావడంపై కూడా ఆయన గుర్రుమన్నారు. గ్రేటర్ ఎన్నికల పరిశీలన కోసం వచ్చిన పార్టీ పరిశీలకుడు కృష్ణమూర్తిని కలిశామని చెప్పిన మంత్రులతో ఆయన ఏకీభవించలేదు. ఎవరు ఏం చేస్తున్నారో పార్టీ అధిష్టానానికి తెలుసునని ఆయన అన్నారు. మంత్రి వర్గ సమావేశాన్ని తేలికగా తీసుకోవడం సరి కాదని ఆయన అన్నారు. రాష్ట్ర ఆర్థిక పరిస్థితి అంత బాగా లేదని, వనరుల సమీకరణ విషయంలో వివిధ శాఖలు దృష్టి పెట్టడం లేదని ఆయన అన్నారు. మంత్రులు ప్రభుత్వ కార్యకలాపాలను నిర్లక్ష్యం చేస్తున్నారని ఆయన అన్నారు.