యాక్టర్ నాగార్జున భూకబ్జాదారు: కెసిఆర్

హైదరాబాద్: సినీ ప్రముఖులు నాగార్జున, రామానాయుడు వంటివారు భూకబ్జాదారులని తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు ఆరోపించారు. హైదరాబాద్ సమీపంలోని గురుకుల ట్రస్టు భూములను నాగార్జున, రామానాయుడు, వైయస్ వివేకానంద రెడ్డి కబ్జా చేశారని ఆయన శనివారం మీడియా ప్రతినిధుల సమావేశంలో ఆరోపించారు. గురుకుల ట్రస్టు భూములను వారికి కట్టబెట్టేందుకు ప్రభుత్వం జీవో జారీ చేసిందని ఆయన అన్నారు. ఎస్సీ, ఎస్టీ, బిసి పిల్లల చదువుల కోసం ఏర్పాటు చేసిన గురుకుల ట్రస్టు భూములను ఆంధ్ర దురాక్రణ దారులు కబ్జా చేశారని ఆయన ఆరోపించారు. ఇది భూముల దురాక్రమణకు ఉదాహరణ మాత్రమేనని ఆయన అన్నారు. వైయస్ రాజశేఖర రెడ్డి, చంద్రబాబు నాయుడు అటువంటి వారికి కొమ్ము కాశారని ఆయన అన్నారు. ఆ భూమి ప్రభుత్వ లెక్కల ప్రకారం రిజిస్ట్రేషన్ విలువనే 6 వేల కోట్ల రూపాయలని, దాని మార్కెట్ విలువ 30 వేల కోట్ల రూపాయలని ఆయన అన్నారు. తెలంగాణలో అక్రమ ఆక్రమణకు గురైన భూముల్లో ఇది చిన్న ముక్క మాత్రమేనని, దాని విలువతోనే తెలంగాణ మొత్తం సస్యశ్యామలం చేసుకోవడానికి వీలవుతుందని ఆయన చెప్పారు.

వినోబా భావే భూదానోద్యమం సందర్భంగా తెలంగాణకు చెందిన వ్యక్తి లక్షా 76 వేల ఎకరాలు దానం చేశాడని, భూదానోద్యమానికి ఆంధ్రావాళ్లెవరూ భూమి ఇవ్వలేదని, తెలంగాణవారే ఇచ్చారని, ఆ భూమిని కూడా కబ్జా చేశారని ఆయన అన్నారు. నార్నే ఎస్టేట్ ఉదంతాన్ని ఆయన వివరించారు. తెలంగాణలో ఆసెన్డ్ భూములను, భూదాన భూములను, గురుకుల ట్రస్టు భూములను, వక్ఫ్ భూములను అక్రమంగా కబ్జా చేస్తున్నారని ఆయన అన్నారు. కోట్ల కోట్ల రూపాయల విలువ చేసే భూములపై ఆంధ్ర దురాక్రమణ గద్దలు తిష్టవేశాయని ఆయన అన్నారు. భద్రత ముసగులో తన దీక్షను భగ్నం చేయడానికి ప్రభుత్వం ప్రయత్నిస్తోందని ఆయన అన్నారు. నార్నే రంగారావు 800 ఎకరాల దళితుల భూములను కబ్జా చేశాడని ఆయన ఆరోపించారు.