వీరప్ప మొయిలీతో రోశయ్య భేటీ

న్యూఢిల్లీ: ముఖ్యమంత్రి కె. రోశయ్య కాంగ్రెసు ఆంధ్రప్రదేశ్ వ్యవహారాల ఇంచార్జీ వీరప్ప మొయిలీతో శుక్రవారం ఉదయం సమావేశమయ్యారు. మూడు రోజుల పర్యటనకు ఢిల్లీ వచ్చిన రోశయ్య శుక్రవారం ఉదయం 11 గంటలకు సిడబ్ల్యుసి సమావేశంలో ప్రత్యేకాహ్వానితుడిగా పాల్గొంటున్నారు. ఈ సమావేశానికి ముందు ఆయన మొయిలీతో సమావేశమయ్యారు. రాష్ట్ర పరిస్థితిపై జస్టిస్ శ్రీకృష్ణ కమిటీని వేసిన నేపథ్యంలో తెలంగాణపై అంశంపై సిడబ్ల్యుసి సమావేశం చర్చించునుంది. ఈ విషయమై మొయిలీ రోశయ్యకు వివరించినట్లు తెలిసింది. రాష్ట్రంలోని తాజా రాజకీయాలపై కూడా వారిద్దరి మధ్య చర్చ జరిగినట్లు తెసుస్తోంది.

కాగా, అంతకు ముందు ముఖ్యమంత్రి రోశయ్యను తెలంగాణ కాంగ్రెసు పార్లమెంటు సభ్యులు కలుసుకున్నారు. తెలంగాణ పార్లమెంటు సభ్యులు పొన్నం ప్రభాకర్, గుత్తా సుఖేందర్ రెడ్డి, రాజయ్య తదితురులు ముఖ్యమంత్రిని కలిసినవారిలో ఉన్నారు. వీరప్ప మొయిలీతో భేటీలో ముఖ్యమంత్రి రోశయ్య వెంట కేంద్రం మంత్రి పళ్లంరాజు కూడా ఉన్నారు. మధ్యాహ్నం ముఖ్యమంత్రి కేంద్ర మంత్రి పి. చిదంబరంతో, సిపి జోషీతో సమావేశం కానున్నారు.