తెలంగాణ జెఎసి పునీతమైంది: కెటిఆర్

హైదరాబాద్: కాంగ్రెసు, తెలుగుదేశం పార్టీలు వెళ్లిపోవడంతో తెలంగాణ రాజకీయ, ప్రజా సంఘాల ఐక్య కార్యాచరణ కమిటీ (జెఎసి) పునీతమైందని తెలంగాణ రాష్ట్ర సమితి (తెరాస) నాయకుడు కెటి రామారావు వ్యాఖ్యానించారు. జెఎసి నుంచి ఆ రెండు పార్టీలు వెళ్లిపోవడం వల్ల రాహువుకేతువులు వెళ్లినపోయినట్లుగా ఉందని ఆయన శనివారం మీడియా ప్రతినిధులతో అన్నారు. డిసెంబర్ 9వ తేదీకి ముందు తెలంగాణ కోసం పోరాటం చేసినవారే ఇప్పుడు జెఎసిలో మిగిలారని ఆయన అన్నారు.

తెలంగాణ ఉద్యమంలో వందలాది మంది విద్యార్థులు ఆత్మబలిదానం చేసుకుంటే వారి కుటుంబ సభ్యుల పరామర్శకు చంద్రబాబు వెళ్లలేదని, కానీ కర్నూలు వరద బాధితుల పరామర్శకు మాత్రం వెళ్లారని ఆయన అన్నారు. తెలుగుదేశం పార్టీ అధ్యక్షుడు నారా చంద్రబాబు నాయుడు కర్నూలు ప్రజలపై బురద కన్నీరు కారుస్తున్నారని ఆయన అన్నారు.