సిబాల్ ను అడ్డుకున్న తెలంగాణ విద్యార్థులు

హైదరాబాద్: కేంద్ర మానవ వనరుల శాఖ మంత్రి కపిల్ సిబాల్ కు హైదరాబాదులోని కేంద్రీయ విశ్వవిద్యాలయంలో శనివారం చుక్కెదురైంది. వైస్ చాన్సలర్ల సమావేశానికి వచ్చిన కపిల్ సిబాల్ ను విశ్వవిద్యాలయంలో అడ్డుకునేందుకు విద్యార్థులు ప్రయత్నించారు. దీంతో ఆయన వెను దిరిగినట్లు సమాచారం. విద్యార్థులు పెద్ద యెత్తున గుమిగూడి జై తెలంగాణ నినాదాలు చేశారు.

విద్యార్థులు ప్లకార్డులు ప్రదర్శించారు. వెంటనే తెలంగాణ రాష్ట్ర ఏర్పాటు బిల్లును ప్రతిపాదించాలని విద్యార్థులు డిమాండ్ చేశారు. తెలంగాణపై కేంద్రం తన వైఖరిని స్పష్టం చేయాలని వారు డిమాండ్ చేశారు. కపిల్ సిబాల్ విసీల సమావేశం అనంతరం మీడియా ప్రతినిధుల సమావేశంలో పాల్గొనడానికి వస్తుండగా ఈ ఘటన చోటు చేసుకుంది. దీంతో కపిల్ సిబాల్ మీడియా సమావేశానికి వచ్చే అవకాశాలు లేనట్లు తెలుస్తోంది.