ఉప ఎన్నికల్లో పోటీ చేస్తాం: డిఎస్

న్యూఢిల్లీ: శాసనసభ ఉప ఎన్నికల్లో పోటీ చేయాలన్న అధిష్ఠానం నిర్ణయంలో ఎలాంటి మార్పూ లేదని పీసీసీ అధ్యక్షుడు డి.శ్రీనివాస్‌ స్పష్టం చేశారు. ఉప ఎన్నికల్లో పోటీ చేయొద్దంటూ పదేపదే ప్రకటనలు చేయడాన్ని మానుకోవాలని పార్టీ ఎంపీలు, ఎమ్మెల్యేలకు సూచించారు. ఉప ఎన్నికల గురించి గానీ, ప్రభుత్వ పనితీరు, వ్యక్తుల గురించి గానీ ఎవరూ బహిరంగ వ్యాఖ్యలు చేయకూడదని ఆయన హెచ్చరించారు. హద్దు దాటిన వారి సంగతిని అధిష్ఠానమే చూసుకుంటుందని హెచ్చరించారు. పార్టీ దక్షిణాది రాష్ట్రాల ప్రాంతీయ సమావేశం ఏర్పాట్ల గురించి చర్చించడానికి ఢిల్లీకొచ్చిన ఆయన బుధవారం మీడియా ప్రతినిధులతో మాట్లాడారు. ఉప ఎన్నికల్లో నిలబడితే ఓడిపోతామని తెలంగాణ ఎంపీలు చేస్తున్న వ్యాఖ్యలు, ప్రభుత్వ పథకాలు సరిగా అమలు కాకపోతే తమ పేపర్లో రాస్తూనే ఉంటామని కడప ఎంపీ జగన్‌ చేస్తున్న ప్రకటనల గురించి విలేఖర్లు ప్రస్తావించినపుడు ఆయన తీవ్రంగా స్పందించారు. దీనిపై తాను ఇదివరకే పిలుపునిచ్చానని, రోజూ మాట్లాడితే తనకూ వాళ్లకూ తేడా ఏముందని ఆయన అన్నారు.

ప్రభుత్వ కార్యక్రమాలను విమర్శించే నాయకులకూ ఈ సూత్రమే వర్తిస్తుందన్నారు. ఏ అంశంపైనా బహిరంగంగా మాట్లాడటానికి వీల్లేదని, ఏదైనా ఉంటే అధిష్ఠానం వద్దకెళ్లి స్వేచ్ఛగా సలహాలు, ఫిర్యాదులు చేసుకోవచ్చన్నారు. బుధవారం మొయిలీతో రాజకీయ చర్చలేమీ చేయలేదని చెప్పారు. రాజ్యసభ అభ్యర్థుల ఎంపిక గురించి ఇప్పుడే మాట్లాడటం తొందరపాటవుతుందని, దానికింకా 28 వరకు సమయం ఉందని అన్నారు. రాష్ట్రంలో అందర్నీ కలుపుకొని వెళ్లే నాయకుడు కావాలన్న కేకే వ్యాఖ్యలపై స్పందించటానికి నిరాకరించారు. దాని అర్థమేంటో ఆయన్నే అడగాలని వ్యాఖ్యానించారు. ఉప ఎన్నికల్లో పోటీచేస్తామంటూ వీరప్ప మొయిలీ వెల్లడించటం తుది నిర్ణయమేనా అని అడగ్గా వీరప్ప మొయిలీ మాటే అధిష్టానం మాట అని ఆయన జవాబిచ్చారు. పార్లమెంటులో తెలంగాణ బిల్లుపెడితే ఎంపీ పదవులకు రాజీనామాచేసి కాంగ్రెసు‌ వారినే గెలిపిస్తామన్న కెసిఆర్ వ్యాఖ్యలపై స్పందించడానికి డీఎస్‌ నిరాకరించారు.