నాయకత్వం చంద్రబాబుదే: బాలకృష్ణ

విజయవాడ: తెలుగుదేశం పార్టీ పురోభివృద్ధికి చంద్రబాబు నాయకత్వంలో ఏ పాత్రనైనా పోషించేందుకు సిద్ధమేనని ప్రముఖ సినీ నటుడు నందమూరి బాలకృష్ణ అన్నారు. పార్టీ ఎప్పుడూ వారసత్వపు ఆస్తి కాదని, తాను ఒక కార్యకర్తనేనని స్పష్టం చేశారు. ప్రస్తుతం సినిమాలపైనే దృష్టిసారించానని, భవిష్యత్తు ఎలా నిర్దేశిస్తే అలా పనిచేస్తానని సమాధానమిచ్చారు. పార్టీ ఆదేశిస్తే పగ్గాలు చేపట్టడానికి కూడా వెనుకాడనని చెప్పారు.

'సింహా' చిత్రం విజయాన్ని పురస్కరించుకొని నారసింహ క్షేత్రాలను సందర్శిస్తున్న ఆయన బుధవారం కృష్ణా జిల్లా వేదాద్రి దేవస్థానాన్ని, గుంటూరు జిల్లా మంగళగిరిలోని శ్రీలక్ష్మినృసింహస్వామి ఆలయాన్ని సందర్శించి ప్రత్యేక పూజలు నిర్వహించారు. ఈ సందర్భంగా మీడియాతో మాట్లాడారు. తన తండ్రి ఆశయాలతో కొనసాగే పార్టీ విజయానికి కృషిచేసే ప్రతి కార్యకర్తా వారసుడేనని వ్యాఖ్యానించారు. పార్టీ పగ్గాలు ఎప్పుడు చేపడతారని మీడియా ప్రతినిధులు అడిగితే''తొందరేముంది, ఇప్పుడు ఆ అవసరమేముంది'' అని ప్రశ్నించారు. "నాకోసం తలుపులు ఎప్పుడూ తెరిచే ఉంటాయి" అన్నారు.