మంత్రి పదవికి జైరాం రాజీనామా?

న్యూఢిల్లీ: కేంద్ర సహాయ మంత్రి జైరాం రమేష్ తన పదవికి రాజీనామా చేసినట్లు వార్తలు వస్తున్నాయి. భారతదేశంలోకి చైనా పెట్టుబడులను తమ ప్రభుత్వం ఆపుతోందని బీజింగ్ లో భారత హోం మంత్రిత్వ శాఖపై చేసిన వ్యాఖ్యలు ఆయన పదవికి ఎసరు తెచ్చి పెట్టాయి. ఆయన చేసిన వ్యాఖ్యలపై కాంగ్రెసు పార్టీ మండిపడుతోంది. ప్రధాని డాక్టర్ మన్మోహన్ సింగ్ ను కలిసి జైరాం రమేష్ వివరణ ఇచ్చారు. హోం మంత్రి పి. చిదంబరాన్ని కలిసి క్షమాపణ చెప్పారు. అయినా ఫలితం లేకపోయింది. జైరాం రమేష్ బుధవారంనాడు ప్రధాని మన్మోహన్ సింగ్ ను కలిసి తన రాజీనామా లేఖను సమర్పించినట్లు తెలుస్తోంది.

ప్రధాని మన్మోహన్ సింగ్, కాంగ్రెసు అధ్యక్షురాలు సోనియా గాంధీలను కూడా కలిసి జైరాం రమేష్ క్షమాపణలు చెప్పారు. ఆయన రాజ్యసభ పదవీ కాలం కూడా ముగుస్తోంది. కర్నాటకకు చెందిన జైరాం రమేష్ ఆంధ్రప్రదేశ్ నుంచి రాజ్యసభకు ప్రాతినిధ్యం వహిస్తున్నారు. ఆయనను తిరిగి రాజ్యసభకు నామినేట్ చేస్తారని భావిస్తున్నప్పటికీ ఆంధ్రప్రదేస్ నాయకులు రాష్ట్రానికి చెందినవారినే ఇక్కడి నుంచి రాజ్యసభకు పంపాలని డిమాండ్ చేస్తున్నారు.