పావలా వడ్డీ రుణాల విడుదల: రోశయ్య

హైదరాబాద్: మహిళా స్వయం సహాయక సంఘాలకు పావలా వడ్డీ రుణాలను వారంలోగా విడుదల చేయాలని ముఖ్యమంత్రి కె. రోశయ్య అధికారులను ఆదేశించారు. ఈ పథకంపై ఆయన శనివారం సమీక్ష నిర్వహించారు. పావలా వడ్డీ రుణాల పథకం అమలకు కేటాయించిన 200 కోట్ల రూపాయలను వారంలోగా విడుదల చేయాలని ఆయన అధికారులకు సూచించారు. మహిళలకు పావలా వడ్డీ రుణాలను ప్రభుత్వం విడుదల చేయకపోవడంపై కాంగ్రెసు కడప పార్లమెంటు సభ్యుడు వైయస్ జగన్ తీవ్ర వ్యాఖ్యలు చేశారు. ఈ నేపథ్యంలో ముఖ్యమంత్రి ఆ రుణాల విడుదలకు నడుం బిగించినట్లు భావించవచ్చు.

గత బడ్జెట్ లో పావలా వడ్డీ పథకానికి ప్రభుత్వం 155 కోట్ల రూపాయలు మాత్రమే కేటాయించింది. దీంతో స్వయం సహాయక సంఘాలకు చెల్లించాల్సిన బకాయిలు పేరుకుపోయాయి. ప్రస్తుత ఆర్థిక సంవత్సరానికి ఈ పథకానికి 770 కోట్ల రూపాయలు కావాల్సి ఉందని అధికారులు అంచనా వేశారు. అయితే ప్రభుత్వం ఈ బడ్జెట్ లో 200 కోట్ల రూపాయలు మాత్రమే కేటాయించింది. ఈ సమీక్షా సమావేశానంతరం రోశయ్య కర్నూలు పర్యటనకు బయలుదేరి వెళ్లారు.