జగన్ ను తిరగనివ్వం: కోదండరామ్

వరంగల్: ముఖ్యమంత్రి పీఠం కోసం డబ్బు సంచులతో ఓదార్పు యాత్ర చేపట్టేందుకు వస్తున్న కాంగ్రెసు కడప పార్లమెంటు సభ్యుడు వైఎస్‌ జగన్‌ యాత్రను తెలంగాణలో జరగనివ్వబోమని తెలంగాణ రాజకీయ, ప్రజాసంఘాల జెఎసి కన్వీనర్‌ ప్రొఫెసర్‌ కోదండరాం అన్నారు. యాత్ర చేసే హక్కు నీకెంతుందో, అడ్డుకునే హక్కు కూడా తమకు అంతే ఉందని ఆయన స్పష్టం చేశారు. ఓదార్పు యాత్రకు బయలుదేరే ముందు తెలంగాణపై తన వైఖరేంటో స్పష్టం చేయాలని డిమాండ్‌ చేశారు.

వరంగల్‌ నగరంలో శుక్రవారం రాత్రి టీఎన్జీవోస్‌ ఆధ్వర్యంలో తెలంగాణ అమరవీరుల సంస్మరణ సభ జరిగింది. ఇందులో కోదండరాం మాట్లాడుతూ చంద్రబాబు తెలంగాణ రైతులపై ప్రేమతోనే పర్యటిస్తున్నానని చెప్పడం నయవంచనగా అభివర్ణించారు. తెలంగాణ రాకుంటే ఈ ప్రాంతం అగ్నిగుండంగా మారుతుందని తెరాస సిద్ధాంతకర్త ప్రొఫెసర్‌ జయశంకర్‌ హెచ్చరించారు.