అగ్ని-2 క్షిపణి ప్రయోగం సక్సెస్

బాలాసోర్: అగ్ని-2 బాలస్టిక్ క్షిపణి ప్రయోగం విజయవంతమైంది. ఒరిస్సా తీరంలోని బాలసోర్ సమీపంలోని వీలర్ దీవుల నుంచి సోమవారం ఉదయం ఈ క్షిపణిని ప్రయోగించారు. అణ్వాయుధాలను మోసుకెళ్లే సామర్థ్యం గల ఈ క్షిపణి భారత సైన్యంలో ప్రధాన భూమిక పోషించనుంది. ఇది 21 మీటర్ల పొడవు ఉంది. 17 టన్నుల బరువు ఉంది. ఇది భారత అంతరిక్ష పరిశోధనలో మరో మైలు రాయి.

అగ్ని-2 క్షిపణి 2 వేల కిలోమీటర్ల లక్ష్యాన్ని ఛేదించగల సామర్థ్యం గలది. గతంలో ఓ ప్రయోగం విఫలమైంది. ఆ వైఫల్యం ప్రమాణాలకు సంబంధించిన సమస్యనే తప్ప ప్రాథమిక లోపం కాదని అంటున్నారు. పేలోడ్ తగ్గిస్తే మరింత దూరంలోని లక్ష్యాన్ని ఇది ఛేదించగలదు. హైదరాబాదుకు చెందిన డిఆర్డీవో లాబొరేటరీతో పాటు అడ్వాన్స్ డ్ సిస్టమ్స్ ఈ క్షిపణిని రూపొందించాయి. భారత్ డైనమిక్స్ లిమిటెడ్ ఇంటిగ్రేట్ చేసింది.