ఆటో డ్రైవర్ కుమారుడు మొహ్మద్ గౌస్ ఎంసెట్ టాపర్

హైదరాబాద్: రోజంతా ఆటోరిక్షా డ్రైవర్ కుమారుడు ఎంసెట్ టాపర్ గా నిలిచాడు. విశాఖపట్నంలోని ముస్లిం తాటిచెర్లపాలెంకు చెందిన ఆటో డ్రైవర్ మహ్మద్‌ అమీర్‌ కుమారుడు మహ్మాద్‌ గౌస్‌ జానీ స్థానిక నారాయణ కళాశాలలో ఇంటర్‌ చదువుతూ ఎంసెట్‌లో ఇంజనీరింగ్‌ ప్రవేశ పరీక్ష రాశాడు. బుధవారం ప్రకటించిన ఎంసెట్‌ మార్కుల్లో మహ్మద్‌ గౌస్‌ జానీ 160 మార్కులకు గానూ 159 మార్కులు సాధించాడు. తన లక్ష్యం, గమ్యం ఎంసెట్‌లో రాష్ట్రవ్యాప్త ర్యాంకు సాధించడమేననీ, దాన్ని అధిగమించానని జానీ చెప్పాడు. తాను ఐఐటి, ఏఏఈఈఈ, విట్‌ వంటి పోటీ పరీక్షలేవీ రాయలేదనీ, కేవలం ఎంసెట్‌కు మాత్రమే తాను శిక్షణ పొందానని చెప్పారు. ఎంసెట్‌లో జానీకి మ్యాథ్స్‌లో 80 మార్కులు, ఫిజిక్స్‌లో 39, కెమిస్ట్రీలో 40 మార్కులతో మొత్తం 159 మార్కులు వచ్చాయి.

నారాయణ విద్యాసంస్థల అధినేత నారాయణ తనకు ఉచిత విద్యను అందించారనీ, తాను సాధించిన ర్యాంకు ఆయనకే అంకితం చేస్తున్నానని జానీ చెప్పాడు. జెఎన్‌టియు హైదరాబాద్‌ ఇంజనీరింగ్‌ కళాశాలలో ఈసీఈ బ్రాంచీలో కానీ, ఆంధ్రా యూనివర్సిటీ ఇంజనీరింగ్‌ కళాశాలలో ఇదే బ్రాంచీలో తాను చేరుతానని గౌస్‌ జానీ చెప్పారు. తన సోదరుడు అంగవికలుడనీ, ఇటీవలే చనిపోయాడని అన్నారు. తనకు ఇంటర్మీడియట్‌లో 965 మార్కులు వచ్చాయనీ, పదవ తరగతిలో 512 మార్కులు వచ్చాయని చెప్పాడు. తన తండ్రి కేవలం పదవ తరగతి వరకు చదివారనీ, తల్లి షహ్‌నాజ్‌ ఇంటర్మీడియట్‌ వరకు చదివి ఇంట్లోనే తమకు సేవలందిస్తుంటారని ఆయన అన్నారు. తనకు ఇష్టమైన హిందీ నటుడు హృతిక్‌ రోషన్‌ అనీ, తెలుగులో చిరంజీవిని ఎక్కువగా అభిమానిస్తానని జానీ పేర్కొన్నారు.