ఆర్ఆర్బీ ప్రశ్నపత్రం లీకేజీ కేసులో 8 మంది అరెస్టు

హైదరాబాద్‌: ఈనెల 6, 13 తేదీల్లో నిర్వహించిన రైల్వే రిక్రూట్ మెంట్ బోర్డు (ఆర్ఆర్బీ) ప్రశ్నపత్రం లీకేజీ వ్యవహారంలో ఆర్ఆర్బీ ఛైర్మన్‌ కుమారుడుతో సహా 8మందిని సీబీఐ అరెస్టు చేసింది. 400 మంది అభ్యర్థుల నుంచి రూ.10.95 లక్షలు నిందితులు వసూలు చేసినట్లు సీబీఐ నిర్ధారించింది. అరెస్టు అయిన వారిలో హాసన్‌-మంగళూరు రైల్‌ డెవలప్‌మెంట్‌ కార్పొరేషన్‌ సీఈవో ఎ.కె.జగన్నాథం కూడా ఉన్నారు.

అరెస్టయినవారిలో హైదరాబాదుకు చెందిన అశోక్ కుమార్ అనే వ్యక్తి ఉన్నాడు. హైదరాబాద్‌, ముంబయి, రాయపూర్‌, కోల్‌కతా, బెంగళూరులో సీబీఐ దర్యాప్తు కొనసాగుతోంది. నిందితులను తమ కస్టడీకి అప్పగించాలని న్యాయస్థానాన్ని సీబీఐ కోరింది. న్యాయస్థానం వచ్చేనెల ఒకటి వరకు నిందితులకు రిమాండ్‌ విధించింది. ప్రాంతీయ భాషల్లో కూడా పరీక్ష నిర్వహించాలనే నిర్ణయాన్ని ఆసరాగా తీసుకుని నిందితులు పకడ్బందీగా ప్రశ్న పత్రం లీకేజీకి పూనుకున్నారు.