సీమాంధ్ర మంత్రులపై కాంగ్రెసు తెలంగాణ నేతల ధ్వజం

హైదరాబాద్: తెలంగాణ రాష్ట్రాన్ని కోరడం దేశద్రోహమని వ్యాఖ్యానించిన సీమాంధ్ర మంత్రులపై కాంగ్రెసు తెలంగాణ నాయకులు నిప్పులు చెరుగుతున్నారు. సీమాంధ్ర మంత్రులను బర్తరఫ్ చేయాలని కాంగ్రెసు సీనియర్ నాయకుడు టి. జీవన్ రెడ్డి డిమాండ్ చేశారు. తాము అలా అనలేదని ముఖ్యమంత్రి కె. రోశయ్యను కూడా సీమాంధ్ర మంత్రులు తప్పు దోవ పట్టించారని ఎమ్మెల్సీ యాదవ రెడ్డి విమర్శించారు. ముఖ్యమంత్రిని తప్పు దోవ పట్టించిన సీమాంధ్ర మంత్రులను తొలగించాలని ఆయన మంగళవారం మీడియా ప్రతినిధుల సమావేశంలో డిమాండ్ చేశారు. మద్రాసు రాష్ట్రం నుంచి విడిపోవడానికి కోస్తాంధ్ర చేసిన ప్రయత్నం కూడా దేశద్రోహమేనా ఆయన ప్రశ్నించారు.

సీమాంధ్ర నేతల వ్యాఖ్యలపై కాంగ్రెసు పార్లమెంటు సభ్యుడు మధు యాష్కీ కూడా మండిపడ్డారు. సీమాంధ్ర మంత్రులు అంకెల గారడీ చేయడం మానుకోవాలని ఆయన సూచించారు. తెలంగాణ అభివృద్ధి చెందిందని సీమాంధ్ర మంత్రులు చేస్తున్న వాదన తప్పని కేంద్ర ప్రభుత్వం ఇచ్చిన వెనకబడిన జిల్లాల జాబితా నిదర్శనమని ఆయన అన్నారు. ఈ స్థితిలో కలిసి ఉండడం కన్నా విడిపోవడమే మంచిదని ఆయన అన్నారు. సీమాంధ్ర మంత్రుల తీరుపై కాంగ్రెసు తెలంగాణ పార్లమెంటు సభ్యుడు మందా జగన్నాథం కూడా మండిపడ్డారు.

కాగా, సీమాంధ్ర మంత్రుల తీరుపై తెలంగాణలో నిరసన జ్వాలలు పెల్లుబుకుతూనే ఉన్నాయి. సీమాంధ్ర మంత్రుల వ్యాఖ్యలకు నిరసనగా వరంగల్ లో న్యాయవాదులు విధులు బహిష్కరించి ర్యాలీ నిర్వహించారు. సీమాంధ్ర మంత్రులను తొలగించే వరకు పోరాటం చేస్తామని వారు చెప్పారు. మహబూబ్ నగర్, రంగారెడ్డి తదితర ప్రాంతాల్లో వివిధ రూపాల్లో ఆందోళనలు చెలరేగాయి.