భూమన కరుణాకర్ రెడ్డి నిరవధిక నిరాహార దీక్ష ప్రారంభం

తిరుపతి: తనపై వచ్చిన అవినీతి ఆరోపణల మీద సిబిఐ విచారణ జరిపించాలని డిమాండ్ చేస్తూ తిరుమల తిరుపతి దేవస్థానం (టిటిడి) మాజీ చైర్మన్ భూమన కరుణాకర్ రెడ్డి శుక్రవారం నిరవధిక నిరాహార దీక్ష ప్రారంభించారు. కుర్తాళం పీఠాధిపతి ఆశీస్సులు తీసుకుని తిరుపతి బస్టాండ్ సమీపంలోని ఎఎస్ సుబ్బలక్ష్మి విగ్రహం వద్ద ఆయన దీక్షకు దిగారు. ఎమ్మెల్సీ వివేకానంద రెడ్డి దీక్ష శిబిరాన్ని సందర్శించి కరుణాకర్ రెడ్డికి సంఘీభావం తెలిపారు.

దేవాలయాన్ని తన సొంత ప్రయోజనాలకు వాడుకుంటున్నట్లు, స్వామి ఆలయ నిధులను సొంతానికి వాడుకున్నట్లు తనపై ప్రతిపక్షాలు విమర్సలు చేశాయని, ఆ విమర్సల నిగ్గు తేల్చాలని తాను కోరుకుంటున్నానని, అందుకే విచారణ జరిపించాలని కోరుతున్నానని ఆయన మీడియా ప్రతినిధులతో అన్నారు. వందల కోట్ల స్వామి భక్తుల ఆరాధ్య దైవమైన శ్రీవెంకటేశ్వర స్వామి ఆలయాన్ని అందరం కలిసి పరిరక్షించుకోవాల్సిన అవసరం ఉందని ఆయన చెప్పారు.