పురంధేశ్వరి, దగ్గుబాటి దంపతులను దుమ్మెత్తి పోసిన సాక్షి డైలీ

హైదరాబాద్: ఓదార్పు యాత్ర విషయంలో గత రెండు రోజులుగా జరిగిన పరిణామాలకు కాంగ్రెసు కడప పార్లమెంటు సభ్యుడు వైయస్ జగన్ కు చెందిన సాక్షి దిన పత్రిక కేంద్ర మంత్రి దగ్గుబాటి పురంధేశ్వరిపై, ఆమె భర్త, శాసనసభ్యుడు దగ్గుబాటి వెంకటేశ్వర రావుపై దుమ్మెత్తిపోసింది. జిల్లాల వారీగా అందరినీ ఒక చోట చేర్చి ఓదార్చవచ్చునని గతంలో సోనియా చేసిన ప్రతిపాదనను జగన్ స్వయంగా ప్రకటన ద్వారా చెప్పారని, అలా చెప్పడాన్ని ధిక్కారంగా అప్పట్లో కొందరు భాష్యం చెప్పారని, ఇప్పుడు ఆ ప్రతిపాదననే కొత్తగా పురంధేశ్వరి చెప్పడంలో ఆంతర్యం ఏమిటని సాక్షి దిన పత్రిక ప్రశ్నించింది. తాను ఢిల్లీ వెళ్లి జగన్ ను కలిస్తే సరిగా స్పందించలేదంటూ దగ్గుబాటి ఎల్లో సిండికేట్ కు చెప్పి రాద్దాంతం చేయడం వెనుక మతలబు ఏమిటని కూడా ప్రశ్నించారు. ఎల్లో సిండికేట్ అంటే సాక్షి అర్థంలో ఈనాడు, ఆంధ్రజ్యోతి.

ప్రకాశం జిల్లా ఎమ్మెల్యేలను సొంత డబ్బులతో ఢిల్లీకి తీసుకెళ్లి ఓదార్పులో పాల్గొనరాదంటూ హైకమాండ్ తో చెప్పించడానికి తంటాలు పడ్డ దగ్గుబాటి, పురంధేశ్వరి తాజాగా పార్టీపరంగా యాత్ర చేపట్టాలనడంలో పరమార్థం ఏమిటని సాక్షి డైలీ తన వార్తాకథనంలో ప్రశ్నించింది. ప్రకాశం జిల్లా శాసనసభ్యులను దగ్గుబాటి వెంకటేశ్వర రావు సంత డబ్బులతో ఢిల్లీకి తీసుకెళ్లారని, దానికితోడు నోట్ లో ఏముందో చూపించకుండా శాసనసభ్యుల చేత ఆ నోట్ ను జగన్ కు ఇప్పించారని సాక్షి ఆరోపించింది. జగన్ కు వ్యతిరేకంగా పురంధేశ్వరి, వెంకటేశ్వర రావు కుట్ర చేస్తున్నారని మొత్తంగా సాక్షి వార్తాకథనం సారాంశం. జగన్ ఓదార్పు యాత్రకు వ్యతిరేకంగా తెర వెనక కథ నడిపిస్తూ ఇప్పుడు తెర మీదికి వచ్చారని సాక్షి ఆరోపించింది. ఎల్లో సిండికేట్ తో వారు కుమ్మక్కయ్యారని సాక్షి ఆరోపించింది. ఈనాడు, ఆంధ్రజ్యోతితో కుమ్మక్కయ్యారనేది పాఠకులు అర్థం చేసుకోవాల్సి ఉంటుంది.