వైయస్ జగన్ పై వి హనుమంతరావు వ్యంగ్యాస్త్రం

హైదరాబాద్: తమ పార్టీ కడప పార్లమెంటు సభ్యుడు వైయస్ జగన్ పై కాంగ్రెసు సీనియర్ నాయకుడు, రాజ్యసభ సభ్యుడు వి. హనుమంతరావు వ్యంగ్యాస్త్రాలు విసిరారు. రాజీవ్ సద్భావనా యాత్ర సందర్భంగా జరిగిన సభలో ఆయన శుక్రవారం ఆ వ్యాఖ్యలు చేశారు. అంబేడ్కర్, గాంధీ కాదు అంతా మా నాన్నేనని కొందరు అంటున్నారని, అది సరి కాదని ఆయన అన్నారు. పార్టీకి సేవ చేయకుండానే పదవులు ఎలా వస్తాయని ఆయన అడిగారు.

రాజీవ్‌గాంధీ ఆశీస్సులతోనే వైఎస్‌ రాజశేఖర రెడ్డికి అప్పట్లో పీసీసీ అధ్యక్షపదవి వచ్చిందని ఆయన అన్నారు. రాజీవ్‌ లేకుంటే వైఎస్‌కు ఆ పదవి దక్కేదా అని హనుమంతరావు ప్రశ్నించారు. పార్టీ అధిష్ఠానాన్ని నమ్ముకుంటేనే పదవులు వస్తాయనే విషయాన్ని అందరూ గ్రహించాలని ఆయన హితవు పలికారు. ఈ కార్యక్రమంలో ముఖ్యమంత్రి రోశయ్య, పీసీసీ అధ్యక్షుడు డి.శ్రీనివాస్‌ తదితరులు పాల్గొన్నారు.