వైయస్ జగన్ పై 2వ తేదీ తర్వాత చర్య తప్పదా?

బెంగళూరు: కడప పార్లమెంటు సభ్యుడు వైయస్ జగన్ పై చర్య తప్పేట్లు లేదు. కాంగ్రెసు ఆంధ్రప్రదేశ్ వ్యవహారాల ఇంచార్జీ వీరప్ప మొయిలీ మాటలను బట్టి ఆ విషయం స్పష్టమవుతోంది. జగన్ ను ఎలా కట్టడి చేస్తారని మీడియా ప్రతినిధులు అడిగితే సెప్టెంబర్ 2వ తేదీ వరకు ఆగండని ఆయన సమాధానమిచ్చారు. జగన్‌వల్ల ముఖ్యమంత్రి కె. రోశయ్య ప్రభుత్వానికి ఎలాంటి ముప్పు లేదని ఆయన అన్నారు. రాష్ట్రంలో పార్టీ వ్యవహారాలను చక్కదిద్దుకోగలమని అన్నారు. శనివారం బెంగళూర్ లో ఆయన మీడియా ప్రతినిధులతో మాట్లాడారు. జగన్ విషయం మాట్లాడలేనని అంటూనే మీడియా ప్రతినిధులు వేసిన ప్రశ్నలకు సమాధానాలిచ్చారు.

రోశయ్య ప్రభుత్వం బాగా నడుస్తోందని, ప్రభుత్వానికి వచ్చిన ముప్పేమీ లేదని తెలిపారు. ఓదార్పు యాత్రపై ముందుకు సాగుతున్న జగన్‌పై చర్యకు 'సెప్టెంబర్ 2'ను గడువుగా నిర్ణయించుకున్నారనే వార్తలను మొయిలీ తోసిపుచ్చారు. "నేను ఎలాంటి గడువులు పెట్టలేదు. మీడియానే పెట్టింది" అని తెలిపారు. మరి జగన్‌ను ఎలా కట్టడి చేస్తారని ప్రశ్నిస్తే- 'సెప్టెంబర్ 2 వరకు నేనేమీ చెప్పలేను' అని ఆయన సమాధానమిచ్చారు.