డి శ్రీనివాస్ ప్రకటన: వైయస్ జగన్ కు మరో షాక్

హైదరాబాద్‌: కాంగ్రెసు కడప పార్లమెంటు సభ్యుడు వైయస్ జగన్ కు మరో షాక్ తగిలింది. ప్రదేశ్ కాంగ్రెసు కమిటీ (పిసిసి) అధ్యక్షుడు డి. శ్రీనివాస్ చేసిన ప్రకటన ఆయనకు శరాఘాతంలా తగిలింది. జగన్ ఓదార్పు యాత్రలో పార్టీ శ్రేణులు పాల్గొనాల్సిన అవసరం లేదని డి. శ్రీనివాస్ సోమవారం చెప్పారు. అంతేకాకుండా, జగన్ యాత్ర పార్టీపరమైంది కాదని, వ్యక్తిగతమైందని ఆయన చెప్పారు. నెల్లూరు జిల్లాలో జగన్ ఓదార్పు యాత్రకు ఏర్పాట్లు చేస్తున్న పార్లమెంటు సభ్యుడు మేకపాటి రాజమోహన్ రెడ్డి, జిల్లా కాంగ్రెసు కమిటీ (డిసిసి) అధ్యక్షుడు గోపాల రెడ్డి చేసిన ప్రకటనను ఓ విధంగా ఆయన ఖండించారు. దీంతో జగన్ శిబిరంలో కలవరం ప్రారంభమైంది. జగన్ ఓదార్పు యాత్ర పార్టీపరమైందని రాజమోహన్ రెడ్డి, గోపాల రెడ్డి ఇంతకు ముందు ప్రకటించారు. దాన్ని ఖండించాలని నెల్లూరు జిల్లాకు చెందిన రాష్ట్ర మాజీ ముఖ్యమంత్రి నేదురుమల్లి జనార్దన్ రెడ్డి, మరి కొంత మంది నేతలు డిఎస్ ను కోరినట్లు తెలిసింది. ఈ నేపథ్యంలో డిఎస్ స్పష్టమైన ప్రకటన చేశారు.

ప్రకాశం జిల్లాలో 8 మంది ప్రజాప్రతినిధులు ఓదార్పు యాత్రకు దూరంగా ఉన్నారు. జగన్‌ వెంట ఆయన బంధువైన మంత్రి బాలినేని శ్రీనివాసరెడ్డి, మరో ఎమ్మెల్యే శివప్రసాదరెడ్డిలు మాత్ర మే యాత్రలో పాల్గొంటున్నారు. ఈ తరుణంలో వచ్చిన డి. శ్రీనివాస్ ప్రకటన ప్రాధాన్యం సంతరించుకుంది. వాస్తవానికి ప్రకాశం జిల్లాలో వీలైనంత ఎక్కువ కాలం గడిపి, తర్వాత పొరుగునే ఉన్న నెల్లూరు జిల్లాలో యాత్రను చేపట్టేందుకు జగన్ వర్గం సన్నాహాలు చేస్తోంది. ఓదార్పు యాత్రకు దూరంగా ఉండాలని మంత్రి ఆనం రామనారాయణ రెడ్డి, ఆనం వివేకానంద రెడ్డి నిర్ణయించుకోవడం జగన్ కు పెద్ద దెబ్బనే. దానికి తోడు, ఓదార్పు యాత్రకు వ్యతిరేకంగా నేదురుమల్లి జనార్దన్ రెడ్డి పావులు కదుపుతోంది. ఈ స్థితిలో జగన్ వర్గానికి తీవ్రమైన వ్యతిరేకత ఎదురయ్యే పరిస్థితి నెలకొని ఉంది.