వైయస్ జగన్ కంపెనీలకు ఇక ఐటి కష్టాలు మొదలు

హైదరాబాద్‌: కాంగ్రెసు కడప పార్లమెంటు సభ్యుడు వైయస్ జగన్ కు ఆదాయం పన్ను శాఖ కష్టాలు ప్రారంభమయ్యే సూచనలు కనిపిస్తున్నాయి. పార్టీ అధిష్టానాన్ని ధిక్కరించి ఓదార్పు యాత్ర చేస్తున్న ఆయన కంపెనీలపైనా ఆయన కంపెనీల్లో పెట్టుబడులు పెట్టిన సంస్థలపైనా ఆదాయం పన్ను శాఖ దృష్టి సారించింది. ఈ మేరకు ఓ ప్రముఖ దినపత్రికలో వార్తాకథనం ప్రచురితమైంది. జగన్ సారథ్యంలోగల సంస్థల్లో పెట్టుబడులు పెట్టిన పది కంపెనీలు, వ్యక్తులకు అంతటి సొమ్ము ఏ విధంగా వచ్చిందీ ఛేదించే పనిని ఆదాయపు పన్ను(ఐటీ)శాఖ ముమ్మరం చేసినట్లు ఆ వార్తాకథనం తెలియజేస్తోంది. పెట్టుబడులకు సంబంధించి ఇప్పటికే కొన్ని కంపెనీల నుంచి వచ్చిన సమాధానాలు ఐటీ శాఖకు సంతృప్తి కలిగించలేదని సమాచారం. దీంతో వాటి రికార్డులను పరిశీలించాలని, అప్పటికీ అనుమానాలు నివృత్తికాకుంటే తనిఖీలు చేయాలని భావిస్తోంది. లెక్కలు లేని మొత్తాలేవైనా ఉన్నట్టు పరిశీలనలో తేలితే వాటికి పన్నును కట్టించుకోవాలని నిర్ణయించినట్లు సమాచారం.

'రాజా ఆఫ్‌ కరప్షన్‌' పేరుతో తెలుగుదేశం, తెలంగాణ రాష్ట్ర సమితి (తెరాస) తయారు చేసిన 333 పేజీల నివేదిక ఆధారంగా ఈ పరిశీలన చేపట్టినట్లు తెలుస్తోంది. వైఎస్‌ ముఖ్యమంత్రిగా ఉన్న కాలంలోనే 2009 ఫిబ్రవరిలో ఈ నివేదికను రాష్ట్రపతికి, మరికొందరు ముఖ్యులకు ఆయా పార్టీల నేతలు అందజేశారు. చట్టాలను ఉల్లంఘించి వివిధ సంస్థల్లో పెట్టుబడులను పెట్టారంటూ కొన్ని ఆధారాలను కూడా ఇందులో పొందుపర్చారు. షేర్ల ధరలను విపరీతంగా పెంచి కొన్నారనే ఆరోపణలు ప్రధానంగా ఉన్నాయి. ఢిల్లీ నుంచి ఈ నివేదిక ఇక్కడి ఆదాయపు పన్ను శాఖ పరిశోధన విభాగానికి చేరింది. ప్రధానంగా సాక్షి పత్రిక, సాక్షి టెలివిజన్‌, భారతి సిమెంట్స్‌లో పెట్టుబడులు పెట్టిన దాదాపు పది కంపెనీలకు ఐటీ శాఖ నోటీసులు ఇచ్చినట్టు తెలిసింది. పెట్టుబడిగా పెట్టిన సొమ్ముకు పన్నును సక్రమంగా కట్టిందీ లేనిదీ తెలుసుకోవటమే ఈ నోటీసుల ఉద్దేశమని ఐటీ వర్గాలు తెలిపినట్లు ఆ వార్తాకథనం సారాంశం.