రంగారెడ్డి జిల్లాలో తెరాస, టిడిపి పోటాపోటీ ఆందోళనలు

రంగారెడ్డి: సోమవారం చంద్రబాబు రంగారెడ్డి జిల్లా పర్యటన సందర్భంగా తెలంగాణవాదులపై పోలీసుల లాఠీచార్జిని నిరసిస్తూ మంగళవారం జిల్లావ్యాప్త బంద్ కు తెరాస పిలుపునిచ్చింది. బంద్ కారణంగా జిల్లాలో రాకపోకలు, వ్యాపారాలు అన్నీ ఎక్కడికక్కడ నిలిచిపోయాయి. జిల్లావ్యాప్తంగా బంద్ పాక్షికంగా ఉన్నప్పటికీ సామాన్యులు ఇబ్బందులు ఎదుర్కొన్నారు. వికారాబాద్, పరిగి, చేవెళ్లలో బంద్ ప్రభావం కనిపించింది.

వికారాబాద్, చేవెళ్లలో తెరాస నాయకులు భారీ ర్యాలీ నిర్వహించారు. మేడ్చల్లో నిరసన చేపడుతున్న నిరసనకారులను పోలీసులు అరెస్టు చేశారు. చంద్రబాబు కాన్వాయ్ పై రాళ్లదాడికి నిరసనగా తెదేపా సైతం స్పందించింది. పరిగిలో ఆ పార్టీ కార్యకర్తలు రహదారిపై ఆందోళన నిర్వహించారు. అనంతరం మునిసిపల్ కార్యాలయాన్ని ముట్టడించారు. బంద్ సందర్భంగా వికారాబాద్, పరిగి, చేవెళ్ల లో బస్సులను అధికారులు నిలిపివేశారు. బస్సులు నడువక పోవడంతో ప్రయాణీకులు తీవ్ర ఇబ్బందులు ఎదుర్కొన్నారు.