వైయస్ జగన్ ఓదార్పు యాత్ర రద్దు: ఒంగోలులో విశ్రాంతి

ఒంగోలు: ప్రకాశం జిల్లాలో కాంగ్రెసు కడప పార్లమెంటు సభ్యుడు వైయస్ జగన్ ఓదార్పు యాత్ర బుధవారంనాడు రద్దయింది. ఆయన ప్రస్తుతం ఒంగోలులో విశ్రాంతి తీసుకుంటున్నారు. ప్రకాశం జిల్లాలో 12 రోజుల పాటు నిరంతరాయంగా యాత్ర సాగింది. ప్రతి రోజు మర్నాడు తెల్లవారు జామున 3 గంటల వరకు యాత్ర సాగుతూ వచ్చింది. తిరిగి ఉదయం ఆరున్నర గంటలకు లేచి తిరిగి ఓదార్పు యాత్రకు సిద్ధకావడం రోజువారీ దినచర్యగా ఉంటూ వచ్చింది. దీంతో నిద్ర సరిగా లేక ఆయన కళ్లు వాచాయి.

జగన్ కు మంగళవారం జ్వరం కూడా వచ్చింది. పూలు కళ్లకు తగలడం వల్ల ఇన్ ఫెక్షన్ వచ్చినట్లు వైద్యులు చెప్పారు. దర్శిలోని మార్కెట్ యార్డు వైద్యులు జగన్ ను పరీక్షించారు. విశ్రాంతి తీసుకోవాలని వారు సలహా ఇచ్చారు. వైద్యుల మాటను సున్నితంగా తిరస్కరిస్తూ మంగళవారం యాత్రను కొనసాగించినప్పటికీ బుధవారం కొనసాగించలేకపోయారు.