చిరంజీవి తెలంగాణ వైఖరిపై కెటి రామారావు ఫైర్

హైదరాబాద్: ప్రజారాజ్యం పార్టీ అధ్యక్షుడు చిరంజీవి తెలంగాణ వైఖరిపై తెలంగాణ రాష్ట్ర సమితి (తెరాస) శాసనసభ్యుడు కెటి రామారావు తీవ్రంగా మండిపడ్డారు. తెలంగాణపై చిరంజీవి తన వైఖరి మార్చుకోవాలని ఆయన బుధవారం మీడియా ప్రతినిధుల సమావేశంలో డిమాండ్ చేశారు. ఆ రోజు సామాజిక తెలంగాణ అన్న చిరంజీవి ఇప్పుడు సమైక్యాంధ్ర అని అంటున్నారని, చిరంజీవికి రాజకీయాలు తెలియవని ఆయన అన్నారు. చిరంజీవి రాజకీయాలకు పనికి రారని, సినిమాలకే పరిమితం కావాలని ఆయన అన్నారు. తమ పార్టీ అధ్యక్షుడు కెసిఆర్ పై చిరంజీవి అర్థం లేకుండా మాట్లాడుతున్నారని ఆయన అన్నారు. తెలంగాణలో సీమాంధ్ర నాయకులు పర్యటించడం, సభలు పెట్టడం సరి కాదని ఆయన అన్నారు. తెలంగాణ సంఘాలు సభలు పెట్టాలనుకున్న కోర్టుల ద్వారా అనుమతి పొందాల్సి వస్తోందని, మిగతా వారికి కూడా అదే వర్తింపజేయాలని ఆయన అన్నారు.

ఎపిపిఎస్సీ చైర్మన్ వెంకట్రామిరెడ్డిని బర్తరఫ్ చేయాలని ఆయన డిమాండ్ చేశారు. ఎపిపిఎస్సీ వ్యవహారాలపై కాంగ్రెసు సీమాంధ్ర పార్లమెంటు సభ్యుడు లగడపాటి రాజగోపాల్ మాట్లాడుతున్న తీరును ఆయన తప్పు పట్టారు. ఎపిపిఎస్సీ వ్యవహారాలపై వెంకట్రామి రెడ్డి కన్నా లగడపాటి ఎక్కువ విషయాలు మాట్లాడుతున్నారని, మెయిన్స్ పరీక్ష ఎప్పుడు పెడతారో.. వెంకట్రామిరెడ్డి ఎప్పుడు పదవీ విరమణ చేస్తారో లగడపాటి మాట్లాడుతున్నారని, ఈ వ్యవహారాలు ఒక పార్లమెంటు సభ్యుడికి ఎలా తెలుస్తాయని ఆయన అన్నారు. న్యాయవ్యవస్థలోని జిపి పోస్టుల్లో తెలంగాణవారికి 42 శాతం వాటా ఇవ్వాల్సిందేనని ఆయన చెప్పారు. ఎపిపిఎస్సీ గ్రూప్ వన్ ప్రిలిమ్స్ పరీక్షలు రద్దు చేసి, తిరిగి నిర్వహించాలని ఆయన డిమాండ్ చేశారు.

జిపి పోస్టుల్లో 42 శాతం వాటా కోరుతూ తెలంగాణ న్యాయవాదులు చేస్తున్న ఆందోళనకు తెరాస శాసనసభా పక్ష నాయకుడు ఈటెల రాజేందర్ మద్దతు తెలిపారు. న్యాయమైన డిమాండ్ తో తెలంగాణ న్యాయవాదులు ఆందోళన చేస్తున్నారని ఆయన అన్నారు. ఎపిపిఎస్సీ గ్రూప్ వన్ ప్రిలిమ్స్ పరీక్షను రద్దు చేసి తిరిగి నిర్వహించాలని, ఎపిపిఎస్సీ చైర్మన్ వెంకట్రామిరెడ్డిని బర్తరఫ్ చేయాలని ఆయన డిమాండ్ చేశారు. ఎపిపిఎస్సీ ఉద్యోగాల్లో రిజర్వేషన్లను కూడా పాటించడం లేదని ఆయన విమర్శించారు.