ముగ్గురి ప్రాణాలు తీసిన వైయస్ జగన్ ఓదార్పు యాత్ర

ఒంగోలు: కాంగ్రెసు కడప పార్లమెంటు సభ్యుడు వైయస్ జగన్‌ ఓదార్పు యాత్ర మూడు కుటుంబాలలో విషాదం మిగిల్చింది. ప్రకాశం జిల్లాలోని మేదరమెట్లలో ఆదివారం జగన్‌ పర్యటనలో భాగంగా స్థానిక బస్టాండ్‌ ఎదురుగా ఉన్న డీఎస్‌ఆర్‌ కాంప్లెక్స్‌ పక్కన శుక్రవారం రాత్రి ఫ్లెక్సీ ఏర్పాటు చేస్తుండగా ప్రమాదవశాత్తు విద్యుదాఘాతంతో ముగ్గురు యువకులు మృతి చెందారు.

డీఎస్‌ఆర్‌ కాంప్లెక్స్‌ సమీపంలోని దుకాణ యజమాని కంచె వెంకట శేషారెడ్డి(45) ఆధ్వర్యంలో ఇనుప చట్రంతో ఉన్న సుమారు 22 అడుగుల జగన్‌ ఫ్లెక్సీని ఆరుగురు యువకులు ఏర్పాటు చేస్తుండగా 11 కేవీ లైన్‌ తగిలింది. ఈ ప్రమాదంలో వెంకట శేషారెడ్డితో పాటు చల్లవారి అయ్యప్ప(22), పేరం పోలయ్య(28) అక్కడిక్కడే దుర్మరణం చెందారు. స్వల్పంగా గాయపడిన శ్రీనివాసరావు, ఆచార్య నరేష్‌లకు స్థానికంగా చికిత్సలు చేస్తున్నారు.