కె చంద్రశేఖర రావును వ్యతిరేకిస్తున్న రాజకీయ జెఎసి నేత కోదండరామ్

హైదరాబాద్: తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావును తెలంగాణ రాజకీయ జెఎసి చైర్మన్ కోదండరామ్ తీవ్రంగా వ్యతిరేకిస్తున్నారు. తెలంగాణ జెఎసి స్టీరింగ్ కమిటీ సమావేశం మంగళవారం జరిగింది. సమావేశానంతరం ఆయన మీడియా ప్రతినిధులతో మాట్లాడారు. తెలంగాణలో పుట్టినవారంతా స్థానికులేననే కెసిఆర్ ప్రకటనను ఆయన వ్యతిరేకించారు. దొంగ ముల్కీ సర్టిఫికెట్లతో తెలంగాణకు వచ్చి ఉద్యోగాలు చేసినవారున్నారని, ఆ దొంగ ముల్కీ సర్టిఫికెట్లతో ఉద్యోగాలు చేస్తూ ఇక్కడ వారికి పుట్టిన పిల్లలు స్థానికులు కాబోరని ఆయన అన్నారు. కెసిఆర్ వ్యాఖ్యల వల్ల తెలంగాణ ఉద్యోగులకు తీవ్ర నష్టం వాటిల్లుతుందని, ఇప్పటికే తెలంగాణలో ఉద్యోగాల్లో స్థానికులకు తీవ్ర నష్టం వాటిల్లిందని ఆయన అన్నారు.

కెసిఆర్ చేసిన ప్రకటనపై తాను వివరణ అడుగుతానని, కెసిఆర్ సమాధానం ఇవ్వాల్సి ఉంటుందని ఆయన అన్నారు. రంగారెడ్డి జిల్లా పరిగిలో బహిరంగ సభ పెట్టాలనే తెలుగుదేశం పార్టీ అధ్యక్షుడు నారా చంద్రబాబు నాయుడి నిర్ణయాన్ని ఆయన తప్పు పట్టారు. చంద్రబాబు తన ప్రయత్నాలు మానుకోవాలని ఆయన సూచించారు. తెలంగాణకు చెందిన తెలుగుదేశం నాయకులు చంద్రబాబు విషయంలో ఆలోచన చేయాలని కూడా ఆయన అన్నారు. పరిగిలో సభ పెట్టి ప్రశాంత వాతావరణాన్ని చెడగొట్టవద్దని ఆయన చంద్రబాబుకు సూచించారు.