కె చంద్రశేఖర రావుకు లగడపాటి రాజగోపాల్ కితాబు

హైదరాబాద్: తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావుకు కాంగ్రెసు విజయవాడ పార్లమెంటు సభ్యుడు, సమైక్యవాది లగడపాటి రాజగోపాల్ మరోసారి కితాబు ఇచ్చారు. తెలంగాణ ప్రాంతంలో పుట్టినవారంతా ఇక్కడి స్థానికులేననే కెసిఆర్ మాటలు ధర్మానికి సంబంధించినవని ఆయన మంగళవారం మీడియా ప్రతినిధుల సమావేశంలో అన్నారు. కెసిఆర్ మాటలను తప్పు పట్టాల్సిన అవసరం లేదని ఆయన అన్నారు. తమ మధ్య సమైక్యవాదానికి, ప్రత్యేక తెలంగాణకు సంబంధించిన చర్చ జరగలేదని ఆయన చెప్పారు. ఎవరం శత్రువులను కాదని, రాజకీయ సిద్దాంత విభేదాలు మాత్రమే ఉన్నాయని ఆయన అన్నారు. ప్రస్తుత స్థితిలో ఏం మాట్లాడినా వార్తే అవుతుందని, అందువల్ల ఆచితూచి మాట్లాడాల్సి ఉందని ఆయన అన్నారు.

భారతంలో శ్రీకృష్ణ రాయబారం విఫలమైనా శ్రీకృష్ణ కమిటీ పరిస్థితి చక్కదిద్దేందుకు, సమస్యను పరిష్కరించేందుకు ఉపయోగపడుతుందని ఆయన అభిప్రాయపడ్డారు. సమస్యలను శాంతియుతంగా పరిష్కరించుకోవాలని ఆయన సూచించారు. ఉస్మానియా విశ్వవిద్యాలయం జెఎసి నాయకులు ఆవేశపూరితంగా మాట్లాడుతున్నారని, వారిని తప్పు పట్టాల్సిన అవసరం లేదని ఆయన అన్నారు. విద్యార్థులు ఆవేశంలో ఉద్యమాలు చేయడం, డిమాండ్ల పరిష్కారం కోసం ఆందోళనలు చేపట్టడం తప్పు కాదని, అయితే వాస్తవాలు గ్రహించి విద్యార్థులు సక్రమ మార్గంలో నడిచేలా చూడాల్సి ఉంటుందని ఆయన అన్నారు.