రవీంద్రనాథ్ రెడ్డిపై పోరు ఆగదంటున్న డిఎల్ రవీంద్రారెడ్డి

కడప: వైయస్ రాజశేఖర రెడ్డి బావ మరిది, కడప మేయర్ రవీంద్రనాథ్ రెడ్డిపై పోరు ఆగదని కాంగ్రెసు సీనియర్ శాసనసభ్యుడు డిఎల్ రవీంద్రా రెడ్డి అంటున్నారు. రవీంద్రనాథ్‌రెడ్డి ఎన్ని లీగల్‌ నోటీసులు ఇచ్చినా భయపడేది లేదని ఆయన మంగళవారం మీడియా ప్రతినిధులతో అన్నారు. కడప మేయర్‌ రవీంద్రనాథ్‌ రెడ్డి పరువునష్టం దావా వేస్తాననడంపై డీఎల్‌ స్పందించారు. రవీంద్రనాథ్‌రెడ్డి మిక్సర్‌ప్లాంట్లు మూయించేవరకు పోరాటం చేస్తానని డీఎల్‌ తెలిపారు.

ఎర్రచందనం దొంగలతో మేయర్‌ రవీంద్రనాథ్ ‌రెడ్డికి సంబంధం ఉందని డీఎల్‌ ఆరోపించారు. ఎర్రచందనం దొంగను విడిపించేందుకు రవీంద్రనాథ్‌రెడ్డి హోంమంత్రి పేషీ నుంచి ఫోన్‌ చేయించారని ఆయన విమర్శించారు. రవీంద్రనాథ్ రెడ్డి మిక్సింగ్ ప్లాంట్లతో పాటు అన్ని మిక్సింగ్ ప్లాంట్లను మూసేయాలని ఆయన ప్రభుత్వాన్ని డిమాండ్ చేశారు.