టెర్రర్ దాడిలో అఫ్షానిస్తాన్ లో ఇద్దరు ఇండియన్స్ మృతి

కాబూల్: తాలిబాన్ చేసిన క్షిపణి దాడుల్లో అఫ్షనిస్తాన్ లోని కునార్ ప్రొవిన్స్ లో ఇద్దరు భారతీయులు మరణించారు. భారత్ కు చెందిన ఓ ప్రభుత్వేతర సంస్థ (ఎన్జీవో) కార్యాలయంపై జరిగిన దాడిలో వారు మరణించినట్లు సోమవారంనాడు వార్తలు వచ్చాయి. తిరుగుబాటుదారులు ఓ భారత ఎన్జీవో కార్యాలయంపై క్షిపణి దాడులు చేశారని, ఈ దాడుల్లో ముగ్గురు మరణించారని, వారిలో ఇద్దరు భారతీయులని అఫ్ఘాన్ తాలిబన్ అధికార ప్రతినిధి ఖారీ ఒమర్ హక్కాని ఓ రహస్య ప్రదేశంలో చెప్పినట్లు న్యూస్ ఇంటర్నేషనల్ తెలిపింది.

క్షిపణి దాడుల్లో మరణించిన మూడో వ్యక్తి ఎవరనేది తెలియాల్సి ఉంది. కునార్ ప్రొవిన్స్ లోని అమెరికా ఎయిర్ బేస్ పై కూడా తాలిబన్లు క్షిపణి దాడులు చేశారని, ఇందులో అఫ్గాన్ నేషనల్ ఆర్మీకి చెందిన ఏడుగురు సైనికులు గాయపడ్డారని హక్కాని చెప్పాడు. అమెరికా ఎయిర్ బేస్ పై, భారత ఎన్జీవో కార్యాలయంపై పది క్షిపణి దాడులు చేసినట్లు తెలిపాడు.