మెడనొప్పితో ఆగిపోయిన వైయస్ జగన్ ఓదార్పు యాత్ర

నెల్లూరు: నెల్లూరు జిల్లా ఓదార్పు యాత్రకు కాంగ్రెసు కడప పార్లమెంటు సభ్యుడు వైయస్ జగన్ ఒక రోజు పాటు విరామం ఇస్తున్నారు. మెడ, భుజం నొప్పుల కారణంగా ఆయన శుక్రవారం ఓదార్పు యాత్రకు విరామం ఇచ్చారు. అభిమానులతో కరచాలనం చేయడం, వాహనంలో డోర్ వద్ద నిల్చొని ప్రజలకు అభివాదం చేయడంతో ఆయనకు గత మూడ్రోజుల నుంచి మెడ, భుజం కండరాలపై ఒత్తిడి ఏర్పడింది. అయినా సాయంత్రంపూట స్థానిక వైద్యులతో చికిత్స తీసుకుని ఓదార్పు యాత్రను కొనసాగించారు. అయితే గురువారం కండరాల నొప్పి తీవ్రమైంది. శుక్రవారం ఉదయం హైదరాబాద్ నుంచి వచ్చిన డాక్టర్ జగన్‌కు వైద్య పరీక్షలు నిర్వహించారు. విశ్రాంతి అవసరమని సూచించారు.

అయినా షెడ్యూల్ ప్రకారం యాత్ర కొనసాగించాలన్న ఉద్దేశంతో యువనేత శుక్రవారం కూడా యాత్రకు బయల్దేరి వెళ్లారు. శుక్రవారం రాత్రి యాత్ర ముగిసిన అనంతరం వైద్యులు ఆయనను మరోసారి పరీక్షించారు. మెడనొప్పి మరింత తీవ్రం కావడంతో కనీసం ఒకరోజు విశ్రాంతి అవసరమని సూచించారు. చికిత్స కొనసాగించారు. దీంతో ఎంపీ మేకపాటి రాజమోహన్‌ రెడ్డి, ఎమ్మెల్యే మేకపాటి చంద్రశేఖర్‌రెడ్డి స్థానిక నేతలతో చర్చించి ఓదార్పు యాత్రకు ఒకరోజు విశ్రాంతి ఇవ్వాలని నిర్ణయించారు. ఆదివారం నుంచి ఓదార్పు యాత్ర యథాతథంగా కొనసాగనుంది.