వైయస్ జగన్ దారి అదే: కాంగ్రెసు నేతలపై దుమ్మెత్తిపోసిన సాక్షి

హైదరాబాద్: కాంగ్రెసు పార్లమెంటు సభ్యుడు వైయస్ జగన్ దారి తిరుగుబాటేనని స్పష్టంగా తెలిసిపోతోంది. సాక్షి కాంగ్రెసు పత్రికేనని, సాక్షిలో సోనియా వ్యతిరేక కథనాలు కూడవని కాంగ్రెసు పార్లమెంటు సభ్యుడు రాయపాటి సాంబశివరావు వంటి నాయకులు చేసిన విమర్శలను సాక్షి దినపత్రిక కొట్టిపారేసింది. సాక్షి వార్తాకథనంపై దుమారాన్ని ఈ ఏడాది కుట్రగా అభివర్ణిస్తూ కాంగ్రెసు నాయకులపై తీవ్రంగా విరుచుకుపడింది. సాక్షి స్వతంత్రంగా వ్యవహరిస్తుందని, ఏ పార్టీకి సంబంధించింది కాదని వైయస్ జగన్ ప్రారంభం రోజే చెప్పారని, ఆ నాయకులు అప్పుడే ఖండించాల్సిందని అంటూ వాదన లేవదీసింది. ఈ ఏడాది ప్రారంభం నుంచి కొంత మంది నాయకులు వైయస్ జగన్ పై కుట్ర చేస్తూ వస్తున్నారని, కుట్రలో భాగంగానే సోనియాపై రాసిన వార్తాకథనాన్ని వాడుకుంటున్నారని, ఇతర పత్రికల్లో అటువంటి కథనాలు వస్తే మాట్లాడనివారు సాక్షి రాస్తే విమర్సిస్తున్నారని వ్యాఖ్యానించింది.

వైయస్సార్ లెజెంజరీ వారసత్వాన్ని వైయస్ జగన్ అందిపుచ్చుకుంటారని భయపడుతున్న నాయకులు కుట్రలు చేస్తున్నారని వ్యాఖ్యానించింది. సాక్షి కాంగ్రెసు పత్రిక అని చెప్పేవారు సాక్షి కార్యాలయంపై పోలీసులు దాడులు చేస్తే ఎందుకు ప్రశ్నించలేదని ప్రశ్నించింది. వైయస్సార్ మరణం వెనక కుట్ర ఉందనే వార్తాకథనాన్ని సాక్షిటీవీ చానెల్ ప్రసారం చేసినప్పుడు పోలీసులు దాడులు చేసిన విషయాన్ని గుర్తు చేసింది. వైయస్ జగన్ ఓదార్పు యాత్రను అడ్డుకుని వైయస్సార్ వారసత్వాన్ని అందిపుచ్చుకోకుండా కుట్రలు చేస్తున్నారని విమర్శించింది. సాక్షి వార్తాకథనంపై కాంగ్రెసు నేతలు చేస్తున్న విమర్సలకు రాష్ట్రవ్యాప్తంగా నిరసనలు వెల్లువెత్తాయని వివిధ వార్తాకథనాలను సాక్షి దినపత్రిక ప్రచురించింది.