ముఖ్యమంత్రి రోశయ్య రాజీనామా లేదు: వి హనుమంతరావు

న్యూఢిల్లీ: ముఖ్యమంత్రి కె. రోశయ్య రాజీనామా చేస్తారని వస్తున్న వార్తలను కాంగ్రెసు పార్లమెంటు సభ్యుడు వి హనుమంత రావు ఖండించారు. రోశయ్య రాజీనామా ఏమీ లేదని ఆయన మంగళవారం మీడియా ప్రతినిధులతో అన్నారు. రోశయ్య కాంగ్రెసు ఢిల్లీ నేతలను ఎందుకు రహస్యంగా కలుస్తున్నారని అడిగితే తనకేమీ తెలియదని ఆయన జవాబిచ్చారు. ముఖ్యమంత్రి రోశయ్య పార్టీ అధ్యక్షురాలు సోనియాను కలిశారా అని అడిగితే తనకేమీ తెలియదని ఆయన అన్నారు. సోనియాను రోశయ్య కలిశారో, లేదో తనకు తెలియదని ఆయన అన్నారు.

పార్టీ క్రమశిక్షణా సంఘం చైర్మన్ ఎకె ఆంటోనీని కలిశారని ఆయన చెప్పారు. ఆంటోనీని కలిసిన విషయాన్ని మీరు కూడా చూశారు కదా అని ఆయన అన్నారు. రోశయ్య ఢిల్లీ వస్తున్నట్లు తమకు చెప్పారని, ఢిల్లీ పర్యటనను రోశయ్య రహస్యంగా ఏమీ ఉంచలేదని ఆయన చెప్పారు. ఇంత తొందరగా తిరిగి రోశయ్య ఎందుకు హైదరాబాద్ వెళ్తున్నారని అడిగితే రాష్ట్రంలో ఏదైనా ముఖ్యమైన పని ఉండవచ్చునని ఆయన సమాధానమిచ్చారు. పార్టీ వ్యవహారాలపై కేంద్ర మంత్రి ప్రణబ్ ముఖర్జీకి ఇస్తారని భావించిన నోట్ ను రోశయ్య ఎకె ఆంటోనీకి ఇచ్చారు.