మంత్రివర్గ ఇరకాటంలో ముఖ్యమంత్రి కిరణ్ కుమార్ రెడ్డి

హైదరాబాద్: మంత్రివర్గ కూర్పు ముఖ్యమంత్రి కిరణ్ కుమార్ రెడ్డిని పూర్తి ఇరకాటంలోనే పడేసింది. మంత్రివర్గంలో అధిష్టానం ముఖాలు ఉంటాయా, ముఖ్యమంత్రి ముఖాలు ఎక్కువగా ఉంటాయా అనే విషయాన్ని పక్కన పెడితే అసలు కూర్పే పెద్ద తలనొప్పిగా మారింది. శనివారం న్యూఢిల్లీ వెళ్లిన కిరణ్ ఆదివారం మధ్యాహ్నం వరకు అక్కడే ఉండే అవకాశముంది. మంత్రివర్గ విషయమై కాంగ్రెస్ పెద్దలతో సమావేశమవుతూ హడావుడిగా కనిపిస్తున్నాడు. కడప పార్లమెంటు సభ్యుడు వైఎస్ జగన్ కారణంగా అధిష్టానం మాజీ ముఖ్యమంత్రి రోశయ్యకు మంత్రివర్గ విస్తరణ తలనొప్పిని తగ్గించింది. అయితే జగన్ ప్రాబల్యం తగ్గించడానికే కిరణ్ ను పీఠంపై కూర్పుండబెట్టిన కారణంగా మంత్రివర్గం విస్తరణ ఖచ్చితంగా చేయాలి.

మంత్రివర్గ విస్తరణ చాలా సమస్యలతో కూడుకున్నందువల్లనే పాత మంత్రివర్గాన్నే ఉంచాలనే భావనలో కిరణ్ ఉన్నట్టు వార్తలు వచ్చాయి. అయితే పాత మంత్రివర్గం ఉండటంపై అధిష్టానంతోపాటు పలువురు కాంగ్రెస్ నాయకులు కూడా సంతృప్తిగా లేరు. కిరణ్ మంత్రివర్గానికి ప్రాంతీయం, వర్గాలు, కులాల వంటి సమస్యలు ఎన్నో ఉన్నాయి. ఉద్యమం బూచి చూపి తెలంగాణ వారు తమకు ప్రధాన్యం ఇవ్వాలని ఇప్పటికే ఒత్తిడి చేస్తుండగా, ఉద్యమం పేరుతో తెలంగాణ వారికి ప్రాధాన్యం ఇస్తే మా పరిస్థితి ఏంటని సీమాంధ్రులు ప్రశ్నిస్తున్నారు.

తెలంగాణ అంశంతో పాటు ఎస్సీలు, ఎస్టీలు కూడా తమ వర్గాలకు మంత్రివర్గంలో చోటు కల్పించాలంటున్నారు. జనాభా నిష్పత్తి ప్రకారం తమకు న్యాయం జరగాల్సిందేనంటున్నారు. తెలంగాణకు చెందిన ఓ సభ్యుడు తెలంగాణ ఉద్యమం కారణంగా తెలంగాణకు ప్రాధాన్యత ఇవ్వడంతో పాటు తమ వర్గానికి సముచిత న్యాయం మంత్రివర్గంలో కల్పించాలని డిమాండ్ చేస్తున్నాడు. కిరణ్ కు జగన్ మరో తలనొప్పి. ఆయన వర్గానికి మంత్రవర్గంలో ఇస్తే ఓ సమస్య, ఇవ్వకుంటే మరో సమస్య. మొత్తానికి ముందు నుయ్యి, వెనుక గొయ్యి అన్నట్టు తయారయ్యింది ముఖ్యమంత్రి పరిస్థితి.దీంతో ఆయన మంత్రివర్గంలో కొత్త ముఖాలెన్ని, పాత ముఖాలెన్ని, ఏఏ ప్రాంతం వారికి, ఏఏ సామాజిక వర్గం వారికి ప్రాధాన్యం ఉంటుందనేది ఇప్పుడు అందరి మదిని తొలుస్తున్న ప్రశ్న.