ఊడిన సలహాదారు పదవి: కెవిపి రామచందర్ రావు హవాకు కత్తెర

హైదరాబాద్: కెవిపి రామచందర్ రావు ప్రభుత్వ సలహాదారు పదవి ఊడింది. ఆరున్నరేళ్ళ పాటు సాగిన ఆయన హవాకు హవాకు తెరపడింది. వైఎస్‌ సీఎంగా ఉన్నంత కాలం ఆయన షాడో సీఎంగా వ్యవహరించారంటారని అంటారు. రోశయ్య సీఎంగా ఉన్నకాలంలో ఆ స్థాయిలో కాకున్నా కేవీపీ కీలక పాత్రనే పోషించారు. ప్రస్తుతం ఆయన ప్రజా భద్రత, రక్షణ సలహాసంఘం ఛైర్మన్‌గా వ్యవహరిస్తున్నారు. సలహాదారులందరి నుంచి రాజీనామాలు తీసుకోవాల్సిందిగా ప్రభుత్వ ప్రధాన కార్యదర్శిని ఆదేశించినట్లు ముఖ్యమంత్రి కిరణ్‌ ప్రకటించారు. ప్రకటన వెలువడ్డ గంటసేపటికే కేవీపీ రాజీనామా చేశారు. ఆ తర్వాత పరిశ్రమల సలహాదారు పీటర్‌ హాసన్‌, విదేశీ పెట్టుబడుల సలహాదారు సీసీరెడ్డిలు తన పదవులకు రాజీనామా చేశారు. మిగిలినవారు రాజీనామాలు చేయడం పెద్ద సమస్యేమీ కాదు.

కేవీపీ ఆదివారం మధ్యాహ్నం ఏపీ భవన్‌లోని ముఖ్యమంత్రి కాటేజీకి వచ్చి కిరణ్‌తో 20 నిమిషాలపాటు భేటీ అయ్యారు. అప్పుడే ఆయనకు రాజీనామా చేయాల్సిన అవసరాన్ని కిరణ్‌ వివరించినట్లు తెలుస్తోంది. ఆ తర్వాత కేవీపీ గంటన్నరపాటు ఏపీ భవన్‌లోని తన గదిలో కూర్చొని ఇతర నేతలతో చర్చల్లో మునిగిపోయారు. అనంతరం అక్కడి నుంచి వెళ్లిపోయారు. కేవీపీపై వ్యతిరేకతతో కాకుండా కొత్త ప్రభుత్వానికి క్లీన్‌ ఇమేజీ కల్పించడం కోసమే ఆయన్ను తప్పించాలని అధిష్ఠానం నిర్ణయించినట్లు పరిశీలకులు విశ్లేషిస్తున్నారు.రాష్ట్ర ప్రభుత్వానికి వివిధ రంగాలకు సంబంధించి మొత్తం 40 మంది వరకు సలహాదారులున్నారు. వీరిలో కొందరు మాజీ అధికారులు కాగా, మరికొందరు వైఎస్‌ కుటుంబీకులు. మిగిలిన వారు వైఎస్‌కు లేదా కేవీపీకి సన్నిహితులు. పాలనాపరంగా ముఖ్యమంత్రి కిరణ్‌ పూర్తి స్వేచ్ఛగా పని చేసేందుకు వీలుగానే అధిష్ఠానం సలహాదారులపై వేటు వేసింది.