బెడిసికొట్టిన వైయస్ జగన్, వైయస్ వివేకానంద రెడ్డి సయోధ్య?

కడప: వైయస్ జగన్ కు, వైయస్ వివేకానంద రెడ్డి మధ్య కుదిరిన సయోధ్య బెడిసికొట్టినట్లే కనిపిస్తోంది. వైయస్ జగన్ మామ గంగిరెడ్డి నివాసంలో జరిగి చర్చల్లో ఇరువురి మధ్య సయోధ్య కుదిరినట్లు వార్తలు వచ్చాయి. ఆ వార్తలకు బలం చేకూరుస్తూ వైయస్ వివేకానంద రెడ్డి వైయస్సార్ ఘాట్ వద్ద నివాళులు అర్పించి, కుటుంబమంతా కలిసికట్టుగానే ఉంటుందని చెప్పారు. ఆ తర్వాత వైయస్ జగన్ తో భేటీ అయ్యారు. ఈ భేటీ సందర్భంగా వైయస్ జగన్, వైయస్ వివేకానంద రెడ్డి మధ్య పొరపొచ్చాలు మళ్లీ బయటకు వచ్చినట్లు భావిస్తున్నారు.

వైయస్ జగన్ కు, వైయస్ వివేకానంద రెడ్డికి మధ్య జరిగిన సమావేశం రెండు నిమిషాల్లోనే ముగిసింది. సమావేశం నుంచి వైయస్ వివేకానంద రెడ్డి విసురుగా బయటకు వచ్చారు. దీన్ని బట్టి ఇరువురి మధ్య మరోసారి కలతలు చెలరేగినట్లు భావిస్తున్నారు. కాగా, వైయస్ జగన్ తో పాటు కుటుంబ సభ్యులంతా వైయస్సార్ ఘాట్ వద్ద నివాళులు అర్పించారు. ఈ సందర్భంగా వైయస్సార్ సతీమణి వైయస్ విజయలక్ష్మి కంట తడి పెట్టుకున్నారు. వైయస్ వివేకానంద రెడ్డి కాంగ్రెసులోనే కొనసాగే అవకాశం ఉంది.