ఏడుగురిని హత్య చేసిన ఉన్మాది, పోలీసులకు లొంగుబాటు

శ్రీకాకుళం: శ్రీకాకుళం జిల్లా జలుమూరు మండలం మెట్టపేటలో బుధవారం తెల్లవారుజామున దారుణం చోటుచేసుకుంది. రిటైర్డ్ మిలటరీ ఉద్యోగి నట్టి శంకరరావు ఉన్మాదిగా మారి కత్తులు, బాంబులతో దాడి చేసి ఏడుగురిని నరికి చంపాడు. గతంలో శంకరావు తన భార్యను హత్యచేశాడు. ఆ కేసు కోర్టులో నడుస్తుంది. ఆ కేసుకు సంబంధించిన సాక్షులను శంకరరావు బుధవారం తెల్లవారుజామున హతమార్చాడు. ఈ ఘటన స్థానికంగా సంచలనం కలిగించింది.

శంకర రావు చేతిలో హత్యకు గురైన వారిలో తన ఇద్దరు పిల్లలు కూడా ఉన్నారు. ఏడుగురు మృతుల్లో ఇద్దరు మహిళలు ఉన్నారు. శంకర రావు పోలీసులకు లొంగిపోయాడు. ఐదేళ్ల క్రితం తన భార్య హత్య కేసులో తనకు వ్యతిరేకంగా సాక్ష్యం చెప్పారనే కోపంతోనే శంకరరావు ఈ దారుణానికి పాల్పడినట్లు చెబుతున్నారు.