కాంగ్రెసుపై ధ్వజమెత్తిన చిరంజీవి: పదవులపైనే ధ్యాసంటూ విమర్శ

హైదరాబాద్: కాంగ్రెసు పార్టీ నాయకులపై ప్రజారాజ్యం పార్టీ అధ్యక్షుడు చిరంజీవి ధ్వజమెత్తారు. కాంగ్రెసు నాయకులకు రైతులు సమస్యలు పట్టడం లేదని, మంత్రి పదవులపైనే వారి దృష్టంతా ఉందని ఆయన విమర్శించారు. రాష్ట్రంలో రైతులు ఎదుర్కొంటున్న సమస్యలపై ప్రజారాజ్యం పార్టీ రాష్ట్ర కార్యాలయంలో ఏర్పాటుచేసిన సదస్సును ఆయన శనివారం ప్రారంభించారు. రైతు సమస్యలను తాను రాజకీయ లబ్ధి కోసం వాడుకోనని, రైతుల ఏజెంటుగా తాను పనిచేస్తానని ఆయన చెప్పారు. రైతు సమస్యలపై ప్రభుత్వం నిర్లక్ష్యం వహిస్తోందని ఆయన అన్నారు.

వ్యవసాయం దండుగ అన్న తెలుగుదేశం సిద్ధాంతాన్నే కాంగ్రెసు కూడా నమ్ముతోందా అనే అనుమానం కలుగుతోందని ఆయన అన్నారు. రైతు సమస్యలపై ప్రధాని స్పందించినా రాష్ట్ర ప్రభుత్వం స్పందించడం లేదని ఆయన అన్నారు. కోటగిరి విద్యాధరరావు, సి.రామచంద్రయ్య, బూరగడ్డ వేదవ్యాస్‌, పలువురు ఎమ్మెల్యేలు, వివిధ జిల్లాలనుంచి వచ్చిన రైతురాజ్యం ప్రతినిధులు సదస్సుకు హాజరయ్యారు. తుఫాను బీభత్సవ వల్ల పంటలు నష్టపోయిన రైతులను ఆదుకునేందుకు జాతీయస్థాయిలో విధానం అవసరమని ప్రరాపా డిమాండ్‌ చేసింది.