డిప్యూటీ సిఎం పదవి: దామోదరం రాజనరసింహ వర్సెస్ గీతా రెడ్డి

న్యూఢిల్లీ‌: ఉప ముఖ్యమంత్రి పదవి కోసం దామోదరం రాజనరసింహ, జె. గీతారెడ్డి పోటీ పడుతున్నారు. ఎస్సీల్లోని వేర్వేరు ఉప కులాలకు చెందిన వీరిద్దరు తనకంటే తనకే ఆ పదవి కావాలని పట్టుబడుతున్నారు. ఉప ముఖ్యమంత్రి పదవి తెలంగాణకు చెందిన ఎస్సీలకు ఇస్తామని అధిష్టానం చెప్పడంతో ఈ పోటీ పెరిగింది. తీవ్ర తర్జన భర్జనల అనంతరం తెలంగాణలో బలీయమైన మాదిగ వర్గానికి చెందిన దామోదర్‌కే పదవి కట్టబెడుతున్నారని ప్రచారం సాగింది. ఇక ప్రకటనే తరువాయి అన్నట్లుగా ఢిల్లీ వర్గాలు కూడా వ్యాఖ్యానించినా మధ్యలో నిలిచిపోయింది. దీనిపై పార్టీలోని తెలంగాణ నేతలతో పాటు ఇతర పార్టీలనుంచి విమర్శలొచ్చాయి. ఉప ముఖ్యమంత్రి పదవిని ఎందుకు పక్కన పెట్టారనేదానిపై పార్టీలో రెండు రకాల వాదనలు వినిపిస్తున్నాయి. రాబోయే కొద్దిరోజుల్లో చోటు చేసుకోబోయే పరిణామాలను గమనించిన మీదటే ఈ పదవిని భర్తీ చేయాలనేది ఒక ఆలోచనగా చెబుతున్నారు.

ఉప ముఖ్యమంత్రి పదవికి మరో మెలిక పడినట్లు సమాచారం. ఉపముఖ్యమంత్రి పదవి తెలంగాణ ప్రాంతానికి ఇచ్చి పీసీసీ అధ్యక్ష పదవి కోస్తా ప్రాంతానికి ఇవ్వడం ఖాయమనే ప్రచారం మొదటినుంచి ఉంది. ఈ మేరకు పీసీసీకి బొత్స సత్యనారాయణ పేరు ఖరారయినట్లే భావించారు. ప్రస్తుత పరిస్థితుల నేపథ్యంలో ఆ రెండు పదవులూ తెలంగాణ ప్రాంతానికే కేటాయించాలనే ప్రతిపాదనను తాజాగా కీలక నేతలు అధిష్ఠానం ముందుంచినట్లు సమాచారం. రాబోయే పరిణామాలను దృష్టిలో ఉంచుకుని తెలంగాణ నేతకు ఆ పదవి కట్టబెడితే పార్టీకి ప్రయోజనకరంగా ఉంటుందని వారు పట్టుబడుతున్నట్లు తెలిసింది.

ఉప ముఖ్యమంత్రి పదవి కోసం భారీపరిశ్రమల శాఖ మంత్రి గీతారెడ్డి మళ్లీ ప్రయత్నాలు ప్రారంభించారు. ఆమె శుక్రవారం కాంగ్రెస్‌ అధ్యక్షురాలు సోనియాగాంధీని కలిశారు. తెలంగాణ మంత్రుల్లో అందరికంటే సీనియర్‌ అయిన తనకు అవకాశం కల్పించాలని విన్నవించుకున్నారు. ప్రతి విషయంలో పార్టీ లక్ష్మణరేఖకు కట్టుబడి పనిచేస్తున్న తనకు కచ్చితంగా పదవి లభిస్తుందని గీతారెడ్డి ధీమా వ్యక్తం చేస్తున్నారు. తెలంగాణ ప్రాంతానికి చెందిన ఎస్సీ ఎంపీలు కూడా ఈ పదవి కోసం ఆమె పేరునే ప్రతిపాదిస్తున్నట్టు సమాచారం. ఇందులో భాగంగా వాళ్లంతా అధిష్ఠానం వద్ద ప్రయత్నాలు చేస్తున్నారు. శుక్రవారం వీరప్ప మొయిలీని కలిసి దామోదర రాజనర్సింహకు బదులు గీతారెడ్డి పేరును పరిశీలించాలని గట్టిగా కోరినట్టు తెలిసింది.